নোনে দিষ্ট্রিক্টকী লৈকোৎ কুকি ভিল্লেজ, ঙরাং অয়ূক পূঙ মঙারোম তাবদা শকখঙদবা খূৎলায় পায়বশিংনা এত্তেক চত্থরকখিবগা লোয়ননা য়ূম খরা মৈ থাদোক্লম্লে।
থৌদোক অদূ কুকি ইনপি মনিপুর (টিম) নদি কুকি ফূরূপকি মনূঙদা য়ানদবা লৈবদগী মখোয় মশেলগী মরক্তা লম্মন খুম্নবনি, কুকিশিংনা মৈ থাজবনি হায়রি অদুগা অতোপ্পা কুকিগী কাঙবূ খরনদি নাগা -কুকি অনীগী মরক্তা লৈনরিবা মূক্নবা অসীগা মরী লৈননা এন এস সি এন-আই এম কাঙবূনা চঙশীল্লক্লগা য়ূমশিং অদূ মৈ থারম্বা ওইগনি হায়না মরাল শীননবা হোৎনরি।
মফম অদুদগী ফংবা পাউ মতূঙ ইন্না, এত্তেক্করশিং অদূগা খুল অদুগী ভিল্লেজ ভল্লন্টিয়রশিংগা অকনবা মওংদা নোংমৈ কাপ্নখি, অদূম ওইনমক এত্তেক্করশিং অদূগী খূৎলায়শিংনা ফবা য়াম্না হেনখিবনা ভল্লন্টিয়রশিংনা মখোয়গা মায়োক্নবা ঙমখিদে। এত্তেক্করশিং অদূনা চঙশীল্লক্লগা য়ূমশিং অদূ মৈ থাদোক্লমখিবনি হায়রি।
নোনে দিষ্ট্রিক্টকি নূংবা সব-দিভিজনগী মনূং চনবা লৈকোৎ ৱাইফৈ ভিল্লেজদা য়ূম মৈ থাখিবা অদূ য়ু টি এল এগী কাঙবূননি। মদূ য়াম্না তমথীবা থৌওং অমনি হায়না কিম্না চেরোল অমদা পেন্দবা অমসুং য়ানীংদবা ফোঙদোক্তুনা, অসীগুম্বা থবক-থৌওংশিং মতূঙদা চত্থরক্তনবা তকশীল্লক্লি। কিম্না মখল অমত্তগী হীঙশা য়াবা ঙম্লোই হায়বা ৱাফমসু থম্লক্লি।
নাকল অমরোমদা, কুকি ইনপি,জিরিবাম অমসুং কুকি ইনপি তমেংলোংনদি এত্তেক অদূ এন এস সি এন -আই এম্ননি হায়না মরাল শীরক্লি।
