ইম্ফাল ইষ্ট দিষ্ট্রিক্টকি মনূঙচন্না খূরাই সাজোর লৈকায়দা লৈবা পাউনম ধনেশ্বর (৬০) কৌবা মীওই অমনা ফেসবূক্তা পি প্রেমানন্দ হায়বা অশাবা মমীংদা হাংবা ফেক এক্কাউন্ট অমা শীজীন্নরগা নাউরিয়া পাখঙলাকপা কেন্দ্রগী এম এল এ শগোলসেম কেবীগী ইজ্জৎ শোকহনবা য়াবা ৱাফম ফোঙদোক্লুই হায়বা মরালদা সাইবর ক্রাইম পুলিসনা মীওই অসী ফাগৎখ্রে।
এম এল এ অমগী পার্সনেল লাইফ অমসুং করেক্তরদা মীৎয়েঙ চঙশীন্দুনা ইজ্জৎ শোকপা ৱাহৈ-ৱাতা শীজিন্নখি হায়বা মরালদা ধনেশ্বরবু ফাগৎখিবনি। মহাক্কি থৌওং অদূবু য়াম্না কন্না য়ানিংদবা ফোঙদোক্লদুনা নাউরিয়া পাখঙলাকপা কেন্দ্রগী মীয়াম্না মীফম অমা ঙরাং পাঙথোক্তুনা লমহেন-তুহেনবা মীওই অসী অকনবা আইনগী ওইবা চৈরাক পীননবা অকনবা মওংদা দিমান্দ তৌখি।
