লমদম অসীগী লময়ানবা অমা ওইনা মনিপুরিশিংনা ঈরাৎনরিবা নেটা হিজম ইরাবতকী ১৩০ শুবা মপোক কুম্মোন থৌরম ঙরাং মনিপুর অমদি মনিপুরিশিংনা খুন্দারিবা ইন্দিয়াগী অতৈ মফমশিংদা পাক-সন্না পাঙথোক্নখ্রে। মপূঙ ওইবা থৌরমদি মনিপুর লৈঙাক্না শীন্দুনা ষ্টেটকি থাক্তা পাঙথোকখিবা অদুনি।
ইম্ফাল ৱেষ্ট দিষ্ট্রিক্টকি থাংমৈবন্দ লিলাসিং খোংনাং মখোঙদা লৈবা ইরাবত স্কৱারদা পাঙথোকখিবা ষ্টেট লেভেলগী সেলেব্রেসন থৌরমদুদা অথোয়বা মীথূঙলেন ওইনা শরূক য়াখিবা চিফ মিনিষ্টর য়ূম্নাম খেমচান্দনা হায়, মশাগী ওইজবা পূম্নমক থাদোক্লম্লগা লৈত-লায়রবা মীয়ামগী, শুরি-নোম্লিবা, হুমাংমলনা হিংননবা হোৎনরিবা, লাঙ্গোলনা লৌবূকশিংদা লৌউ-শীংঊ তৌরিবা অমদি শিন্মী ওইনা থবক তৌজরিবশিংগী নৈহৎপিরবা হক ফংননবা মীয়ামগী লূচীংপুরেল ওইনা থবক তৌবদা মপুন্সি কত্থোকখিবা নেটা অসীগী মতীক-মগুন কয়া অদুদি শীঙথাদুনা লোইবা নাইররোই। মহাক্কি মতীক-মগুনশিং অদূদি ঙসীগী মীরোলনা তমজনিঙায়নি হায়খি।
নিংথৌকোলগী নিঙোল লৌদুনা লৈবাক্কি অচৌবা ফম্নাইবা ওইদুনা ঙমখৈ লৈতনা নুঙাইবগী পুন্সি মরেল অদূ থাদোক্লম্লগা, চাকথূং-ফিথুংদ্রবা, লায়রবা মীয়ামগী য়াইফনবা অকনবা খোঙজঙ চঙশীনবদগী অন্দরগ্ৰাউন্দ ফাওবা তাদুনা য়াম্না ৱানা পুন্সি লেনখিবা, কত্থোকপগী আইকোন ওইনা লৈরিবা নেটা অসীগী কুম্মোন লাকপদা লমদমসিদা লময়ানবা অসীনা পামজরম্বা কাঙলূপ মশেল নুংশি-চান্ননা হিংমিন্নবগী মঙলাল অদূ থবক্তা ওন্থোকপা হায়বসিনা লময়ানবা অসীদা ঐখোয়না তমজবা খূদোল ওইহল্লসি হায়না চিফ মিনিষ্টরনা ফোঙদোকখি।