বিরেনগী ওদিও টেপ্পিং কনভর্জেসন অদূ শেমজীন শাজিনবা রিপোর্টনি হায়না সুপ্রিম কোর্টনা ফোঙদোরকখ্রে

মনিপুরদা হৌজিক মায়োক্নরগা লৈরিবা হীঙশাগী ঈরাঙ অসী মনিপুরগী হান্নগী চিফ মিনিষ্টর নোংথোম্বম বিরেন্না হীঙশা চত্থবা পাম্বা মৈতৈ কাঙলূপকি মীওইশিংদা ঈন্সীনবদগী থোকখিবনি হায়না কুকি ওরগনাইজেসন ফোর হ্যুমেন রাইট ট্রস্তনা বিরেনগী খোঞ্জেলনি হায়বা ওদিও টেপ্পিং কনভর্জেসন রেকোর্দিংগা লোয়ননা সুপ্রিম কোর্টতা কেস অমা ফাইল তৌরকখিবা অদূগী মতাঙদা ঙরাংসু মখাতানা হীয়ারিং চত্থখিবগা লোয়ননা খোঞ্জেল অদূ হান্নগী চিফ মিনিষ্টর নোংথোম্বম বিরেনগী নত্তে,শেমজীন -শাজিনবা খোঞ্জেল অমনি হায়না এপেক্স কোর্ট অসীগী মায়কৈদগী ফোঙদোরকখ্রে।
বিরেনগীনি হায়রিবা ওদিও টেপ্পিং কনভর্জেসন অদূ তশেংনা থওইনা তৌগে মতাগুম মোদিফাই তৌরবা,টেম্পর তৌদুনা শেম্বা অমসুং এদিট তৌথোক্লগা মান্ননবা শেমজীন শাজিনবা খোঞ্জেলনি,বিরেন মশামক্কি খোঞ্জেলগা চানদে হায়না এপেক্স কোর্ট অসীগী জষ্টিস সঞ্জয় কুমারনা লুচিংবা বেঞ্চনা ঙরাং কেস অসীগী হিয়ারিং চত্থবদা ফোঙদোরকখিবনি।

হান্নগী চিফ মিনিষ্টর অসীগী খোঞ্জেলনি হায়দুনা কুকি ওরগনাইজেসন ফোর হ্যুমেন রাইট ট্রস্তনা ফাইল তৌরক্লিবা ওদিও টেপ্পিং কনভর্জেসন রিপোর্ট অদূ গুজরাটকি গান্ধীনগরদা লৈরিবা নেস্নেল ফোরেন্সিক সাইন্স য়ুনিভর্সিটিদা থাদুনা টেষ্ট তৌহল্লুরবা মতূঙদা পীরকপা কনফিদেন্সিয়েল রিপোর্ট অদূ ঙরাং হিয়ারিং চত্থবদা সুপ্রীম কোর্টকি বেঞ্চ অদূনা পাথোক্তুনা,বিরেনগী অশেংবা খোঞ্জেলগা চাংদম্নদুনা য়েংলবা মতূঙদা খোঞ্জেল অদূ এদিট তৌরবা অমদি মোদিফাই তৌদুনা শেমজীল্লকপা অমনি হায়বদূ কনফার্ম তৌখিবনি।কুকি ওরগনাইজেসন ফোর হ্যুমেন রাইট ট্রস্তকি মায়কৈদা লেপখিবা এদভোকেট ভূসন্না সুপ্রিম কোর্টকি ওবজার্বেসন অদূবু য়ানীংদবা ফোঙদোকখি।অদূম ওইনমক এপেক্স কোর্টকি মায়কৈদগী মঙোন্দা অনৌবা মরমশিংগা লোয়ননা মশাগী ক্লেম অমা ফাইল তৌবসু য়াগনি হায়না খুদোংচাবা অমদি পীখি।