রেবিজ লায়না ঙাকথোক্নবা মালেমগী লৈবাকশিংনা চহী খূদীংগী সেপ্তেম্বর ২৮ অসী “ৱার্ল্ড রেবিজ ডে” হায়না থৌরম পাঙথোক্তুনা লাক্লি। মালেমগী ওইনা চৎলিবা চহী অসীগী থিম্না “ষ্ট্রোঙ্গর টুগেদর” হায়বসিনা ওইরি।
মসীগী মনূঙচন্না মনিপুর লৈঙাক্কি ভেটরিনারি এন্দ এনিমেল হজবেন্দ্রি দিপার্টমেন্ট না শীন্দুনা ঙরাং ৱার্ল্ড রেবিজ ডে, ২০২৬ কি থৌরম অমা দিরেক্টরেট অসীগী সঞ্জেন্থোংদা লৈরিবা ফার্মর্স ট্রেনিং হোলদা পাঙথোকখ্রে। দিপার্টমেন্ট অসীগী সেক্রেটরি রঙ্গিতাবলি ৱাইখোম্না থৌরম অদুগী অথোয়বা মীথূঙলেন ওইনা শরূক য়াখি। দিপার্টমেন্ট অসীগী দিরেক্তর দা. এল অরুনকুমারনা প্রিসাইদ তৌখিবা থৌরমদুদা ভেটেরিনরি এন্দ এনিমেল হজবেন্দ্রি দিপার্টমেন্ট অসীগী জোইন্ট দিরেক্টর (প্লান্নিং) অমদি অতৈ ওফিসিয়েল কয়ানা ঈকায়খুম্নরবা মীথূঙ ওইনা শরূক য়াখি।
অথোয়বা মীথুংলেন ওইনা ৱা ঙাঙবদা রঙ্গিতাবলি ৱাইখোম্না হায়, রেবিজ লায়না মপূঙফানা মূত্থৎপা হায়বসিদা এনিমেল হজবেন্দ্রি সার্বিসেস লোয়শঙ অমসুং হেল্থ সার্বিসেস দিপার্টমেন্ট অনী অসীখক্তনা হোৎনরগা মায় পাকপা ঙম্লোই। লায়না-লাইচৎ অসী মপূঙফানা মাঙহন্সি হায়রবদি কম্যুনিটি, ষ্টেকহোল্ডরশিং, লোকেল বোদিশিং অমদি মীয়াম্না মপূঙফানা শরূক য়ামিন্নদুনা চঙশীনমিন্নবা তঙায় ফদবনি হায়খি।
