মনিপুরদা পূন্না হিংমিন্নদুনা মথায় থায়নদগী লৈরক্লবা কাঙলূপ ৩৬ অসী কৈদৌনুংদা লাপথোক্নবা য়াররোইদবনি। ঐখোয় মশেল মরক্তা অমনা অমবু ঈকায় খুম্নরবা, অশোয়বা অরানবা কয়া তৌরুরবসু ঙাকপিবগী চৎনবি অমা শেমগৎপা ঙম্লবদি লমদমসিদা ঈঙ-তপ্পা মহৌশাগী শক্তম অদূ পুরকপা ঙমগনি, নুঙাই য়াইফবা, চাওখৎপা লমদম অমা পুরকপা ঙমগনি হায়না মনিপুরগী চিফ মিনিষ্টর য়ূম্নাম খেমচান্দ না ফোঙদোকখ্রে।
ঙরাং ইম্ফালগী সিটি কনভেন্সন্দা পাঙথোকপা জনজাটিয়া গাউরব দিবস কি ষ্টেট লেভেল সেলেব্রেসন্দা অথোয়বা মীথূঙলেন ওইনা ৱা ঙাঙবদা চিফ মিনিষ্টরনা মসী ফোঙদোক্লদুনা হায়, লৈমিন্নরিবা কাঙলূপশিং অসীগী মরক্তা কাঙলূপ অমগী খুদোংচাদবা অৱাবা মতমদা অতৈ ফূরুপশিংনা মতেং পাংবগী হৈনবি লাক্লবা মতমদুদা ঈঙ-তপ্না নুঙাইরবা ঈরমদম অমা ওইরক্কনি।
ভগৱান বির্ষা মুন্দাগী ১৫১ শুবা মপোক কুম্মোন থৌরম অদু মনিপুর লৈঙাক্কি ট্রাইবেল এফিয়র্স এন্দ হীল্স না শীন্দুনা পাঙথোকখিবনি। থৌরমদুগী মনূঙ চন্না ষ্টেট লেভেল ট্রাইবেল কলচরেল ফেষ্টিবেলসু হৌদোকখি। থৌরমদুদা চিফ মিনিষ্টরনা, ফ্রীদম ফাইটর রানি গাইদিনল্যুগী পোক্নফম লমদমদা অখন্নবা ম্যুজিয়ম অমা শাগৎপা হৌখ্রে হায়খি।
সেন্তরগী প্রোজেক্ট অসী মিনিষ্ট্রি ওফ কলচরগী মীৎয়েং মখাদা পায়খৎপনি হায়না চিফ মিনিষ্টরনা ফোঙদোকখি।
