হন্দক নুমিৎ হুম্নি-মরিনি অসীগী মনূঙদা সেনাপটি দিষ্ট্রিক্টকি মনূঙচন্না লৈরিবা তাফৌ কুকি অমসুং ঊখ্রূল দিষ্ট্রিক্টকি ন্যু হেবন এরিয়াশিংদা কুকি অমদি নাগা কাঙলূপকি মীওই ৫ লৈখিদ্রবা মতূঙদা হৌজিক ওইরক্লিবা লো এন্দ ওর্দরগী ফীভম কূপ্না য়েংশিনবগা লোয়ননা সেক্যুরিটি রিভ্যু মিটিং অমা চিফ মিনিষ্টর য়ূম্নাম খেমচান্দ না চিয়র লৌদুনা পাঙথোকখ্রে।
ইম্ফালগী বাবুপারাদা লৈরিবা চিফ মিনিষ্টর সেক্রেটরিয়েৎকি কেবিনেট হোলদা পাঙথোকখিবা সেক্যুরিটি রিভিউ মিটিং অদুদা ষ্টেটকি হোম মিনিষ্টর গোবিন্দাস কোন্থৌজম, চিফ সেক্রেটরি রাজিব সিংহ থাকুর, সেক্যুরিটি এদভাইজর কুলদিপ, দি জি পি মুকেশ সিংহ অমদি মনিপুর পুলিস অমসুং সেন্ট্রেল সেক্যুরিটি এজেন্সি শিংগী মকোকথোংবা ওফিসারশিং শরূক য়াখি।
খুদোং থীগনবা মফমশিংদা মখাতানা সেক্যুরিটিগী অহেনবা চেকশীন থৌরাংশিং লৌখৎনবা চিফ মিনিষ্টরনা মরী লৈনবশিংদা খঙহনখি। হৌজিক মফমশিং অদুদা দিপ্লোয় তৌরিবা সেন্ট্রেল সেক্যুরিটি ফোর্সকি কাঙবূদসু অহেনবা মপাঙ্গল হাপকৎনবা ৱারেপ লৌখি।
