খাঙবোক এসেমব্লি কন্সটিট্যুয়েন্সিদা লৈরিবা লম্বী-থোং অয়াম্বা ফীভম কা-হেন্না ফত্তনা লৈরে। নিংথমথা চঙলকপা মতমসিদা উফুল-ৱাইফুলনা মরম ওইদুনা মীয়ামগী হকশেলদা য়াম্না চাউনা অকায়বা পীরক্লি। ফীভম অসিদগী খরা মখৈ ঙাকথোক্তুনা মীয়াম্বু লায়না-তীন্নাদগী খরদং ওইরবসু কন্ননবা পান্দমদা লম্বীদা লাকপা মীওইশিংদা ফেস-মাস্ক য়েন্থোকপগী দ্রাইব অমা ঙরাং চত্থখ্রে।
শঙ্গাইয়ূম্ফমগী মীয়াম্না মাস্কশিং য়েন্থোকখিবা থৌরমদুদা শরুক য়াখিবা সোসিয়েল এক্টিভিষ্ট মোহম্মদ সমসুর খান্না হায়, শঙ্গাই য়ূম্ফম মায়কৈগী লম্বী অসী য়াম্না ফীভম ফত্তনা লৈরকপা মতম শাংলক্লে। মীয়ামগী চত্থোক চৎশিন তৌবদা ঈকঙথা মতমদা উফূল কা হেন্না থোকপা, অদুগা নোংজুথা মতমদনা লৈখোম-লৈনাঙ ময়াম্না মহৈরোয়শিং অমদি মীয়ামদা চাউনা খুদোং চাহন্দ্রি। মরী লৈনবা এম এল এ দসু লম্বীশিং অসী শেমজীনবীনবা কয়ারক হায়জখ্রবসু ঙসী ফাওবা হন্না য়েংশিনবিরক্তবা অসী পেন্দে হায়খি।
অথুবা মতমদা মনিপুর লৈঙাক্না অমসুং মরী লৈনবা এম এল এনা য়েংশিনবিদুনা লম্বীশিং অসী শেমজীনবিয়ু, মীয়াম্না মায়োক্নদুনা লাক্লিবা অৱাবা অসী কোকহনবিয়ু হায়খি।