সেন্টরদা বি জে পিনা লুচিংবা এন দি এগা লৌতূনরগা লৈবাক অসীগী চমজরবা মীচম মীয়ামদা নমথাক তৌদুনা ভোৎ হুরানবগী থবক্তা মরুওইবা থৌদাং লৌবনি হায়না ওপ্পোজিসন পার্টিশিংনা য়াম্না কন্না য়ানিংদবা ফোঙদোক্তুনা লাক্লিবা, লৈবাক অসিগী চিফ ইলেক্সন কম্মিস্নার(সি ই সি) গ্যানেস কুমারবু খূদক্তা মফমদগী লৌথোক্কদবনি, ফাদুনা জেলদা থমদুনা আইনগী মতূঙ ইন্না অকনবা চৈরাক ফংহনগদবনি হায়বা খোল্লাউশিংগা লোয়ননা ইম্ফাল ইষ্ট দিষ্ট্রিক্টকি কংগ্ৰেস ৱার্করশিং অমসুং পার্টী অসীগী লুচিংবশিং শরূক য়ারদুনা খোঙজঙ চঙশিনখ্রে।
মশীঙ য়াম্লবা এম পি সি সি ইম্ফাল ইষ্ট কি থৌমীশিং অদুনা দিপ্যুটি কম্মিস্নার ইম্ফাল ইষ্ট কি ওফিস কমপ্লেক্স মমাঙদা থোমজীল্লক্তুনা গ্যানেস কুমারগী চরূনা শাবা ইফিজিসু মৈ থাখ্রে। খেত্রিগাও কেন্দ্রগী হান্নগী এম এল এ মোহম্মদ আমিন সাহা, লম্লাই কেন্দ্রগী অচোইবম দেবেন নচিংবা মীওই কয়াসু ঙরাঙগী খোঙজঙ অদুদা শরুক য়াখি। চৈরকশিদা, চিফ ইলেক্সন কম্মিস্নার গ্যানেস কুমার সস্পেন্দ তৌরে হায়দুনা নমথাক তৌবা ওর্দর অমা থোক্লক্লিবা অসী লৈবাক অসিগী মীয়াম্বু উশিত্তবা অমসুং করেম্নবনি, চমজরবা মীয়াম্বু করিসু লৈতনা লৌবনি, মীয়ামগী দেমোক্রেটিক রাইট মৎনবা হোৎনবনি হায়বা খোল্লাউ কয়ামরুম লাউখি।
মমৈথঙদা ইম্ফাল ইষ্ট ডিষ্ট্রিক্ট পুলিসকি টিম অমা লাক্তুনা মৈ অদূ মূত্থখিবগা লোয়ননা কংগ্ৰেসকি থৌমীশিং অদু তকথোকখি।