মনিপুরদা হৌখিবা চহি খরা অসিদা মপান্দগী লোন্না, আইনগী ৱাংমদা চঙশীল্লকপা ইম্মিগ্ৰেন্টশিংনা য়েলহৌমী ওইরিবা মৈতৈ অমসুং নাগা ফূরূপকি মথক্তা লান্দারক্তুনা, মীহাৎ-মীপুন কয়া চত্থরক্তুনা য়েলহৌমীশিং মূত্থৎনবা হোৎনরক্লিবা অসী চপচানা থেংনদুনা মনিপুরগী য়েলহৌমীশিং অমসুং ঈরমদম অসীবু কলহৌনবা অমত্তা ঙায়রবা পান্দমদা নাগা অমসুং মৈতৈ কাঙলূপ অনীগী মৈরা পায়বী ইমাশিং পূন্সীন্দুনা অনৌবা লূপ অমা শেমখ্রে।
ইম্ফাল ৱেষ্ট দিষ্ট্রিক্টকি মনূঙ চন্না লৈবা অৱাং শেকমাইদা লৈবা এদভান্স ৱিমেন সোসাইটি অপূনবা মৈরা পায়বীগী প্রসিদেন্ট উসম অমুবীগী য়ূমদা মায়কৈ অদোমগী খুঙ্গং ২০ দগী লাকখিবা মৈতৈ অমসুং নাগা ফূরূপকি মৈরা পায়বী লূপশিংনা অনৌবা লূপ শেমখিবা থৌরম অদুদা শরুক য়াখি। ঙরাং নৌনা শেমখ্রবা লূপ অদূগী মমীং “নোর্থ ইন্দিজিনস ৱিমেন্স ওর্গানাইজেসন” হায়বসিনি। লূপ অসীগী প্রসিদেন্ট ওইনা উশম অমুবিবু য়েৎনবা লৈতনা খনখ্রে। ভাইস প্রসিদেন্ট ওইনা মীয়াম্না ৱারেপ্পম সনাহনবীবু খনখি। অনৌবা লূপ অসীগী সেক্রেটরি ওইনা রূথ থ্যুমাই না মীয়ামগী থৌগল তৌরগনি লোয়ননা অতৈ থৌপুগদবা কয়াসু খনখি।
মীতোপ কয়া লমদমসিদা লোন্না চঙশীল্লকপদগী য়েলহৌমীশিংদা পীরক্লিবা অচৌবা চৈথেং ময়াম অসীদগী ঈশাবু কঞ্জনবা অমসুং অসীগুম্বা মীতোপশিং অসী তকথোকখিনবা অপূনবগী পাঙ্গল শাগৎপগী অহানবা খোঙথাং অমদা অনৌবা লূপ অদূ শেম্বনি হায়না নাগা অমসুং মৈতৈ, চীঙমী তম্মি অনীগী অপূনবা লূপ অসীগী ফাওন্দর প্রসিদেন্ট ওইরবী উশম অমুবীনা ফোঙদোকখি।
You may also like
-
ঊখ্রূল দিষ্ট্রিক্ট হোস্পিটালদা নর্স, দাক্তর পূম্নমক মহুৎ শিল্লগা চল্লাইদুনা লৈরম্লে
-
ক্রেফটন ইন্দিয়া রাইজিং ষ্টার ইনভাইটেস্নেল ২০২৬ তা ক্রেজি ক্রেটোসনা চেম্পিয়ন লৌখ্রে
-
ইন্দিয়াদা মনিপুরনা খ্বাইদগী লূ-নানবা ষ্টেট ওইহন্নবা পান্দম থম্লি: দা.ক্রিষ্ণনন্দ
-
কালিৱাংবৌ অবোনমাইগী মপোক-কুম্মোন থৌরম জেনিম্সকি মোর্গ তা পাঙথোকখ্রে
-
মনিপুরগী লৌফম চাদা ৮০ হেন্না লৌ পানবা য়াদ্রে