মিনুথোং হট্টা গোলাপটি এথলেতিক য়ুনিয়ন (এম ঐচ জি এ য়ু) গী মতম শাংনা জেনরেল সেক্রেটরি ওইনা থৌ পুরমখিবা মোহম্মদ জিয়াউলহক না ঈখঙ খঙহৌদনা চৎলিবা সেপ্তেম্বর থা অসীগী ৫ দা লৈখিদবদা মিনুথোং গোলাপটি এরিয়া অমসুং অকোয়বদা লৈরিবা সিভিল সোসাইটি ওর্গানাইজেসনশীংনা থম্মোয় শোক্না অৱাবা ফোঙদোকপগী থৌরম অমা ঙরাং পাঙথোকখ্রে।
এম ঐচ জি এ য়ুগী ওফিসতা পাঙথোকখিবা অৱাবা ফোঙদোকপগী থৌরমদুদা য়ুনিয়ন অসীগী প্রসিদেন্ট ওইনা থৌ পুরিবা নজিম্মুদ্দিন্না হায়, জিয়াউলহক্না য়ুনিয়ন অসীগী ওফিস বিয়ারর অমা ওইনা হৌখিবা কুমশিং ২০০১ দগী ২০২৫ ফাওবা থৌ পুরমখিবা মতমদা লৈকায়গী মীয়াম অমসুং ষ্টেট অসীগী অৱাবা তারবা মীয়ামগী থৌগল তৌদুনা কত্থোকপা অমগা লোয়ননা পূকচেল শেংনা থবক তৌরমখি। লমদম অসীগী কলচর, স্পোর্টস য়োকখৎনবা অমসুং ফূরূপশিং নুংশি-চাননা লৈমিন্ননবা লেপ্পা লৈতনা হোৎনরমখি। মহাক্না লৈত-লায়রবা কয়াগী মতেং পাংবগী মথক্তা মখোয়গী ফীভম হেন্না ফগৎননবা থবকশিং পায়খৎম্মি। মহাক্না লৈখিদবদা অৱাবা মায়োক্নরিবা ঈমূঙ-মনূঙ অমসুং মরূপ-মপাঙশিংগী অৱাবদা লূপশিং অসীনা শরুক য়াজরি হায়বা ৱাফমশিং ফোঙদোকখি।
লৈখিদ্রবগী থৱায়না মপূগী খূয়াদা ঈংনা-চীক্না, নুঙাইনা লৈরুবা ওইরসনু হায়না শেম্বীবা মপূ মহাক্কি মফমদা দুৱা তৌদুনা থৌনিজখি।
