কুমশিং ২০২৩ গী মে থাগী চৈচৎ ৩ দগী য়েলহৌমী মৈতৈ ফূরূপকি মথক্তা হীঙশাগী লান চত্থরক্তুনা ঙসী ফাওবা চিন-কুকি নার্কো টেরোরিষ্টশিংনা মনিপুর থুগাইনবা অমদি মৈতৈ ফূরূপ অসীবু মূত্থত্তুনা মাঙহন্ননবা হোৎনদুনা লাক্লি হায়না পল্লেল মায়কৈগী সিভিল সোসাইটি ওর্গানাইজেসনশীংনা ফোঙদোরক্লি।
কুমশিং ২০২৩ গী সেপ্তেম্বর ৮ দা কুকি মিলিটেন্টশিংনা চত্থরকখিবা এত্তেক অমদা মৈতৈ ফূরূপ অসী কন্ননবা লান্থেংনরম্লগা কুকি মিলিটেন্টশিংগী খূত্তা থৱায়না পোন্থা পীখিবা ককচীং চুম্নাং লৈকায়দগী য়েংখোম জিতেন, অপোকপা য়েংখোম অতো অমসুং সোইবম ননাও, অপোকপা লৈখিদ্রবা সোইবম ননাওগী মফমদা মীয়াম্না হৈকৎ-লৈকৎ তমদুনা ইকায়খুম্নবা ঊৎপগী থৌরম অমা ঙরাং ককচীং দিষ্ট্রিক্টকী পল্লেল মনীং লৈকায়দা লৈবা কম্যুনিটি হোলদা পাঙথোকখিবদা শরূক য়াখিবশিংনা ৱাফম অসী ফোঙদোরকখিবনি।
লানফম অদুদা অশোক-অপন মায়োক্নখিবা মীওইশিংগী মফমদসু ঈকায়খুম্নবা উৎখি। থৌরম অদূ য়ূনাইটেদ কম্মিটি পল্লেল; য়ূথ ভল্লন্টিয়র এসোসিয়েসন, পল্লেল; সোসিয়েল দেভেলপমেন্ট ওর্গানাইজেসন, পল্লেল; অরম্বাই তেঙ্গোল য়ুনিট-৪০, পল্লেল অমসুং মৈরা পায়বী অপূনবা লূপ, পল্লেলনা খূৎশম্নদুনা শীনখিবনি।
