মীয়ামগা লোয়ননা কেম্পেইন ফোর জষ্ট এন্দ ফ্যের দিলিমিটেসন (জে এফ দি) না মনিপুরদা সেন্সসকি থবকশিং পায়খত্রিঙৈ মমাংদা এন আর সি হান্না অপদেট তৌগদবনি, কুমশিং ১৯৫১দা কট ওফ বেজ ইয়র ওইরগা এন আর সি অপদেট তৌগদবনি হায়না চঙশীল্লক্লিবা খোঙজঙ অসী মনিপুর লৈঙাক্কি এম এল এ, মিনিষ্টরশিং অমদি ব্যুরোক্রেট ওফিসারশিং অসীনা হেন্না থৱায় য়াওশীনবগা লোয়ননা পূক্নীং থৌগৎফম থোকপনি। মখোয় য়েলহৌমী নত্তব্রা হায়না জে এফ দিগী কনভিনর জিতেন্দ্র নিঙোম্বনা অকনবা ৱাফম থমখ্রে।
ঙরাং ইম্ফাল ইষ্ট দিষ্ট্রিক্টকি নিয়ু চেক্কোন কম্যুনিটি হোলদা, এন আর সি অপদেট তৌগদবনি, ১৯৫১ দা বেজ ইয়র ওইগদবনি, সেন্সসকি ৱাফম এন আর সিগী মতূঙদা খন্নগদবনি হায়বা দাবী তৌদুনা চত্থখিবা ৱাকৎ মীফমদা জে এফ দিগী কনভিনর জিতেন্দ্র নিঙোম্বনা ৱাফম অসি ফোঙদোকখিবনি। মহাক্না হায়, মনিপুরগী লৈরিবা এম এল এশিং, মিনিষ্টরশিংনা চৎলিবা সেপ্তেম্বর থা অসীগী ১০ ফাওবগী মনুংদা দিল্লিদা চত্তুনা অথূবা মতমদা মনিপুরদা কুমশিং ১৯৫১ দা বেজ ইয়ার ওইবা এন আর সি অপদেট তৌহন্ননবা সেন্টরগী ওইবা ৱারেপ লৌহনগদবনি। মদূ নত্রবদি জে এফ দিনা মীয়ামগা লোয়ননা মখল-মখা কয়াগী অকনবা খোঙজঙ চঙশীল্লগনি হায়খি।
আইন কায়বা মওংদা মীতোপ মীয়ানচাশিংনা চঙশীল্লক্লগা মনিপুরগী চীঙখোঙ-চীঙয়া কয়াদা খুন্দাশিনখ্রে হায়বসি লৈঙাক্কি লুচিংবশিং অসীনা খঙনা খঙনা তূমিন্না, উশিন্নদনা লৈথোক্লিবসি ঐখোয় য়েলহৌমীশিংগী ওইনা খ্বাইদগী লাইবক থীবনি হায়বা ৱাফম জিতেন্দ্রনা থমখি।
ৱাকৎ মীফম অদূ নিয়ু চেক্কোন সেনিয়র সিটিজন্স, নিয়ু চেক্কোন মৈরা পায়বী, নিয়ু চেক্কোন লৈকায়গী শীঙলূপ্না খূৎশম্নরগা চত্থখিবনি।
