চৎলিবা জুলাই থা অসীগী মঙাদগী দিল্লিদা লৈরক্লিবা মনিপুরগী সি এস ও ১৪, হায়রিবা লূপ অসীনা ঙরাং মিনিষ্ট্রি ওফ হোম এফ্যের্সকি মকোকথোংবা ওফিসিয়েলশিং অমদি রেজিষ্ট্রার জেনরেল ওফ ইন্দিয়াগা উনদুনা, মনিপুরদা হৌজিক ওইরক্লিবা, মীতোপ্না খূৎলীংদুনা হীঙশাগী ঈরাং থোকহল্লকপগী মতাংদা কূপ্না পাউদমখিবগা লোয়ননা নেস্নেল রেজিষ্টর ওফ সিটিজন্স(এন আর সি) মপূঙফানা থবক্তা ওন্থোক্ট্রিফাওবা মীকোক থীবগী থবক-থৌরম অমত্তা পায়খৎলকপা য়ারোই হায়বা ৱাফম য়াওরবা মেমোরেন্দম পীশীন্দুনা তকশীনখ্রে হায়রি।
সি এস ও ১৪ না থাদোরকখিবা চেরোল অমগী মতূঙ ইন্না, মনিপুরদা ইন্দিয়াগী অশেংবা, অচূম্বা সিটিজন অমসুং আইন কায়না, লোন্না চঙশীল্লকখিবা মীতোপশিং নীংথীনা মশক খঙদোক্তুনা মীতোপশিং অদূ মশাগী হান্নগী মরমদমশিংদা হলহনখিগদবনি। হৌখিবা চহী অহূম হেন্না কাঙলূপকি ঈরাং থোক্তুনা লৈরকখিবদগী মনিপুরদা হৌজিক মীওই লিশিং ৫০/৬০ রোম লাঞ্জেন্নদুনা রিলিফ কেম্পশিংদা লৈরি। অসীগুম্বা ফীভম অসিদা সেন্সস পাঙথোকপদা অচুম্বা দেটা ফংবা ঙম্লোই। কুমশিং ১৯৫১ দা বেজ ইয়ার ওইরগা এন আর সি থবক্তা হান্না ওন্থক্লবা মতূঙ মীতোপশিং মপূঙফানা মরমদমশিংদা হলহনখ্রবা মতুঙদা সেন্সসকি থবক পায়খৎকদবনি।দেলিমিটেসনগা মরী লৈনবা থবকসু হৌজিক অমত্তা পায়খৎপা য়াখিরোই হায়বা ৱাফমশিং মেমোরেন্দম অদুদা য়াওই হায়না ফোঙদোরক্লি।
কুমশিং ১৯৫০ দা সেন্টর লৈঙাক্না থোকখিবা সেদ্যুল্ড ট্রাইবকি ওর্দর অদুগী খুদোংচাবা কয়াদু মনিপুরদা ১৯৫১ গী মতূঙদা লোন্না, আইন কায়না চঙশীল্লক্তুনা খুন্দাশিনখ্রবা মীতোপশিংনা লৌদুনা মখোয়বু কন্সটিট্যুসন্না ঙাক্লৌ পীদুনা লৈরক্লি হায়বসি মীয়াম্না খঙনরবা ৱাফম অমনি।শম্বল খাদবা ঙমখৈ পরীংদা লোন্না চঙশীল্লকখিবা মীতোপশিংনা মনিপুরগী হীঙশাগী ঈরাঙ অসী থোকহল্লিবনি হায়বা ৱাফম কয়া মেমোরেন্দম অদুদা পল্লি হায়রি।