মুকেস সিংহ মনিপুরগী দি জি পি ওইনা চার্জ লৌখ্রে

লদাখ পুলিসকি চিফ ওইনা লৈরকখিবা, ১৯৯৬ বেচকি  আই পি এস ওফিসার, এ জি এন ই য়ু টি- কেদর অসী ঙরাং মনিপুর পুলিসকী দিরেক্তর জেনরেল ওইনা চার্জ লৌখিবগা লোয়ননা মথৌ পাঙথোকপা হৌখ্রে। মহাকপু ওকপগী থৌরমদা মনিপুর পুলিসকি পার্সনেলশিংনা গার্দ ওফ ওনর পীখি। পুলিসকি মকোকথোংবা ওফিসার কয়াসু শরুক য়াদুনা ইম্ফালগী মন্ট্রিপুখ্রিদা লৈরিবা, নৌনা শারবা মনিপুর পুলিস হেদক্বার্টরদা মহাকপু তরাম্না ওকখি।

মুকেস সিংহ অসী এন আই এ অমসুং কাউন্টর ইন্সর্জেন্সি ওপরেসনশিংদা য়াম্না মরূওইবা থৌদাং পুরকখিবগী মথক্তা লালহৌবগী ঈরাং য়াম্না কল্লিবা লদাখতা মতম শাংনা পুলিসকি দি জি পি ওইদুনা লাকখ্রবা আই পি এস ওফিসার অমনি। মহাক হৌখিবা থাংজা নুমিত্তা চহী অহূমগী ইন্টর কেদর দিপ্যুটেসন্দা মনিপুরগী দি জি পি ওইনবগীদমক ইম্ফালদা থুংলখিবনি। ঙরাং মহাকপু গার্দ ওফ ওনর পীদুনা ঈকায়খুম্নখিবা থৌরমদুগা লোয়ননা পুলিসকি মকোকথোংবা ওফিসারশিংগা ইন্ট্রদক্টরি সেসন অমসু চত্থখি।

পুলিস ফোর্সতা থবক তৌরিবা পার্সনেলশিং অমদি মকোকথোংবা ওফিসারশিংনা রুল ওফ লো অমদি কন্সটিট্যুসন ঙাক্না থবক পায়খৎকদবনি। কম্মিটমেন্টগা লোয়ননা প্রোফেস্নেলিজম,দিসসিপ্লিন হায়রিবশিং অসী থাগোন্নরগা মীয়ামগী সেবা তৌগদবনি। মীচঙ-মীখায় নাইদনা পিপল সেন্ট্রিক ওইবা মওংদা থবক তৌগদবনি হায়না মনিপুরগী অনৌবা দি জি পি অসীনা ফোঙদোকখি। মনিপুরগী হৌজীক ওইরিবা লো এন্দ ওর্দরগী ফীভমশিং অসী হেন্না ফগৎহন্ননবা অমদি কাঙলূপ মশেল উংখৎনরিবা কয়া অসি লোইশিলহন্নবগী মতাঙদা সিষ্টর সেক্যুরিটি এজেন্সি কয়াগা কোর্দিনেসন নীঙথীনা লৈহন্দুনা থবক লৌখৎসি হায়বা ৱাফম অনৌবা দি জি পি অসীনা ওফিসারশিং অদূদা থমখি।