জর্নেলিষ্টশিংগী থাগী পেন্সন লূপা লিশীং তরা পীরগনি, ফেমিলি পেন্সন্না লিশীং তরেত্তা হেঙ্গৎলগনি: সি এম

ষ্টেট অসীগী জর্নেলিষ্টশিংনা থবক্তগী পোত্থারবা মতূঙদা হৌজিক, থা অমদা লূপা লীশীং ৮ ফংলিবা অসীগী মহূত্তা লূপা লীশীং অনী হাপকৎলগা লূপা লীশীং তরা পীরগনি অদুগা ফেমিলি পেন্সন্না হৌজিক লূপা লীশীং মঙা পীরিবা অসীদগী হেঙ্গৎলগা লূপা লীশীং তরেৎ ফংলগনি হায়না চিফ মিনিষ্টর য়ূম্নাম খেমচান্দনা ফোঙদোকখ্রে।
ঙরাং ইম্ফালগী মেজোরখুলদা লৈরিবা মনিপুর প্রেস ক্লবতা পাঙথোকখিবা ওল মনিপুর ৱার্কীং জর্নেলিস্ত য়ুনিয়ন (অমজু) গী ৫২ শুবা ফাউন্দেসন দেগী থৌরমদা অথোয়বা মীথুংলেন ওইনা শরুক য়াখিবা চিফ মিনিষ্টরনা ৱাফম অসী ফোঙদোকখিবনি। হীরম অসীগী মতাঙদা কেবিনেট মীফমদা ৱারেপ অমা লৌরগনি হায়খি।
জর্নেলিষ্ট পেন্সন স্কিমদা য়াওরম্লগা তোঙান তোঙানবা মরমদগী মশাগী পীফম থোকপা কন্ট্রিব্যুসন মতম শাংনা পীবা ঙমদনা লাকখ্রবা জর্নেলিষ্টশিংগী য়েংলগা মখাতানা য়াওবা য়াননবগী মতাঙদসু কেবিনেটতা পুথোক্তুনা ৱারেপ অমা লৌরগনি হায়না থৌরমদুদা চিফ মিনিষ্টরনা লাউথোকখি। প্রিন্ট অমসুং ইলেক্ট্রোনিক মিদিয়াগী হৌজিক পীথোক্তনা লৈরিবা বিলশিং অসীগী মতাঙদা লৈঙাক্না খন্নরগনি। দি আই পি আরগী খূত্থাঙদা লৈঙাক্না মতম মতমগী ওইনা প্রিন্ট অমসুং ইলেক্ট্রোনিক মিদিয়াশিংদা হাপ্লিবা এদভর্টিজমেন্টশিং অসীগী বিলগী মতাঙদা মরী লৈনবা দিপার্টমেন্ট শিং অমসুং দি আই পি আরগী মরক্তা পাউ ফাওনবা খরা ৱাৎহৌবদগী বিলশিং অসী মতম চানা পীথোকপা ঙমখিদবনি হায়না চিফ মিনিষ্টরনা শেংদোকখি।
হীরমশিং অসীগী মতাঙদা হন্দক সেপ্তেম্বর ২৫ দা ফমগদৌরিবা কেবিনেট মীফমদা খন্নদুনা ৱারেপ লৌরগনি হায়বা ৱাফমশিং মহাক্না ফোঙদোকখি।