থৌবাল দিষ্ট্রিক্ট কি মনূঙচন্না লৈরিবা উমংলাই লায়কোল ৩৫ গী মরূওইবা থৌপুবা কয়ানা শরূক য়ারদুনা ঙরাং “উমংলাই কন্সি, কাঙলোন চুম্না হরাওসি,” হায়বা হীরমসিদা খন্ন-নৈনবগী মীফম অমা পাঙথোকখ্রে।
উকলগী মশা লোয়শঙ থৌবালনা শীন্দুনা থৌবাল নোঙ্গাংখোংদা লৈবা থৌবাল নিংথৌ লায়নীংথৌ লাইরেম্বিগী খুভমদা পাঙথোকখিবা খন্ন-নৈনবগী মীফম অদুনা লমদমসিদা মহৌশাগী লাই হরাওবগী চৎনা-কাঙলোনশিংদগী থৈদোকখিদুনা মরিং-মরাংবা থৌওংশিং চত্থনরকপগী মতৌ অমা উবা ফংলক্লিবা অসীগী মতাঙদা কন্না নুংনাংবা ফোঙদোক্নখি। ঐখোয়গী মহৌশাদগী পরীং নাইনা চৎনরক্লবা লাই হরাওবগী পথাপশিং অসী ঙাক্তুনা, কায়হন্দনা থম্ননবা উকলনা অকনবা থবকশিং পায়খত্তুনা লাক্লি। থৌওং অসী মখাতানা চত্থখিগনি অদূগা মরী লৈনবা খূদীংমক্নসু কাঙলোন চুম্না লাই হরাওবগী থৌরমশিং পাঙথোকপিয়ু হায়না মীফম অদূনা আপিল তৌখি।
ঙরাংগী মীফম অদুদা উকলগী ভাইস প্রসিদেন্ট মোইরাংথেম জিলাঙম্বা, জেনরেল সেক্রেটরি মুতুম মনিতোন, মনিপুর য়ুনিভর্সিতি ওফ কলচরগী দিপার্টমেন্ট ওফ উমংলাই হরাওবগী এসোসিয়েট প্রোফেসর দা. থৌনাউজম রুহিচান্দ অমদি থৌবাল নিংথৌ লায়নীংথৌ লাইরেম্বিগী সেলুংবা টি বিনোইনা প্রেসিদিয়ম মেম্বরশিং ওইনা শরুক য়াখি।