মনিপুরগী নীংতম লান্দা থৌনা ফনা লান্থেংনরম্লবা মতূঙদা ব্রিটিশকি খূত্তা থৱায় থাখ্রবা অথৌবশিং অদূবু নীঙশীংবগী থৌরম অমা অন্দামান মনিপুরি এসোসিয়েসন্না শীন্দুনা ঙরাং আগষ্ট ১৩, অথৌবশিংগী নুমিৎকি অয়ূক পূং ১১ তারকপদগী হৌনা মাউন্ট মনিপুরদা হৈকৎ-লৈকৎ তমদুনা থৌরম পাঙথোকখ্রে।
মাউন্ট মনিপুর অসী মনিপুরগী নীংতম লানগা মরী লৈনবা মফম অমা ওইবনা থৌরমদু পাঙথোকপনি হায়না অন্দামান মনিপুরি এসোসিয়েসনগী মায়কৈদগী ফোঙদোরক্লি।
নাকল অমরোমদা, মনিপুর প্রদেশ কংগ্রেস কম্মিটিনা শীন্দুনা ঙরাং ইম্ফালগী বির টিকেন্দ্রজিৎ রোদতা লৈবা কংগ্ৰেস ভবন্দা অথৌবশিংগী নুমিৎ নীংশীংদুনা হৈকৎ-লৈকৎ তমখি, ঈকায়খুম্নবা উৎখি। এম পি সি সীগী প্রসিদেন্ট ওক্রম ইবোবিনা লুচিংদুনা কংগ্ৰেসকি থৌমীশিং অমসুং মীয়াম্না শরুক য়াদুনা হৈকৎ-লৈকৎ তমখি। থৌরমদুদা সি এল পি লিদর কে মেঘচন্দ্র, সি দব্লিউ সিগী মেম্বর গাইখাঙমসু শরূক য়াখি।
পেট্রিয়ত্স রাইটর্স ফোরম্না অথৌবশিংগী মফমদা ইকায় খুম্নবা উত্তুনা হৈকৎ-লৈকৎ তম্বগী থৌরম অমসু রতনকুমার মেমোরিয়েল স্কুলদা পাঙথোকখ্রে।থৌরম অদূদা পদ্মশ্রি এৱার্দি নামৈরাকপম কুঞ্জরানি, ষ্টেট কালা একাদেমি এৱার্দি নরেন্দ্র নিঙোম্বনচিংবা শক্নায়রবা মীওই কয়াসু শরুক য়াখি।
জষ্টিস কম্মিটি ওন এংলো-মনিপুরি ৱার,১৮৯১ মার্টিয়র্স এন্দ ফ্রীদম ফাইটর্স ওফ কংলৈপাক অমসুং হেরিটেজ কনভেন্ট অনীনা খূৎশম্নদুনা অথৌবশিংগী নুমিৎ নীংশীংদুনা হৈকৎ-লৈকৎ তম্বগী থৌরম অমসু হাওরং সাবলদা পাঙথোকখি। প্রোফেসার নাউরেম জয়কুমার, জষ্টিস কম্মিটিগী চ্যেরমেন জয়চন্দ্র কোন্থৌজম, নিংথেমচা নীংশিং লূপকি প্রসিদেন্ট আর কে বিদ্যাপতি নচিংবা মীওইশিং থৌরমদুদা শরুক য়াখি।
