মনিপুর প্রেস ক্লব লিংখৎখিবা চহী ৫০ শুরকপগী সনা ফূদোংবা থৌরম, গোল্ডন জুবিলি সেলেব্রেসন, চৎলিবা দিসেম্বর থা অসীগী ৬ তা ইম্ফালদা লৈবা মনিপুর প্রেস ক্লবকি বিল্ডিংদা পাঙথোকখ্রে। থৌরম অদুদা ওল মনিপুর ৱার্কিং জর্নেলিষ্ট য়ুনিয়নগী তোঙান- তোঙানবা এৱার্দ অহুমসু হৈথোই- শিংথোইরবা জর্নেলিষ্ট অহুমদা লান্থোক্তুনা পূক্নিং থৌগৎখি। থৌরমদুদা মনিপুর লেজিসলেটিব এসেমব্লিগী স্পিকর থোকচোম শৈত্যব্রত্ত না অথোয়বা মীথূঙলেন, মনিপুর লৈঙাক অসীগী হেল্থ মিনিষ্টর দা. সাপম রঞ্জন, থাংমৈবন্দ কেন্দ্রগী এম এল এ খুমুকচম জয়কিসন অমসুং এদিটর গিল্ডস মনিপুরগী প্রসিদেন্ট খোগেন্দ্র খোমদ্রামনা অখন্নবা মীথূঙশিং ওইনা শরুক য়াখি।
ঈ-পাউগী লমদা লৈদুনা মীয়ামদা মতম মতমগী পাউ ফংহন্দুনা লৌশিং পীরিবা জর্নেলিষ্ট অমদি মেদিয়া হাওসশিংনা অচূম্বা অশেংবা পাউখক্তমক মীয়ামদা য়ৌহন্ননবা হোৎনসি হায়না থৌরম অদুগী অথোয়বা মীথূঙলেন টি ঐচ শৈত্যব্রত্তনা ফোঙদোকখি। হৌখিবা চহী য়াঙ্খৈগী মতমসিদা মনিপুর প্রেস ক্লবনা লমদম অসীগী মীয়ামগী অচৌবা সেবা তৌদুনা লাক্লি। অৱাবা নুঙাইবা কয়াগা লোয়নখিবা খোঙচৎ অসীদা লমদম অসী থোকখিবা থৌদোক ৱাথোক কয়াগা ঈরোয়নখিবা ঈরমদম অসীগী পুৱারিগা শাগোন্ন রিবনি হায়খি।
মনিপুর খুন্নাই অসীগী অচূম্বা মায়োন পুরক্নবা হোৎনবদা পাউমীশিংনা লৌরিবা থৌদাংদি শীংথাদুনা লোইবা নাইররোইদবনি হায়না শৈত্যব্রত্তনা মখাতানা ফোঙদোকখি। কনফ্লিক্ট সিচুয়েসন অমগা শাগোন্নদুনা লৈরিবা মনিপুরগুম্বা মফমশিংদদি মেদিয়াগী থৌদাং অসী অমুক্কা হেন্না মরু ওইরিবনি হায়না এম এল এ জয়কিসন্না থৌরমদুদা ফোঙদোকখি।