মনিপুর কনবা নুমীৎ পালন তৌখ্রে

কুমশিং ১৯৪৮ গী সেপ্তেম্বর ২১ দা মনিপুর ঈমাগী অথোয়বা মপারি, মীয়ামগী লূচীঙপুরেল নেতা ইরাবতকি লমজীঙ মখাদা মীয়ামগী মীফম অমা ইম্ফালগী য়াইস্কুলদা লৈরিবা মনিপুর দ্রমাটিক য়ুনিয়ন ( এম দি য়ু) দা কৌখিবা নুমীৎ অদুবু মনিপুর কনবা নুমীৎ হায়দুনা মনিপুর লৌমী মরূপ্না চহী খূদিংগী পালন তৌদুনা লাক্লি। হন্দক চহী অসীগী ওইনসু লৌমী মরূপ অসীনা মনিপুর কনবা নুমীৎ অমসুং লৌমীশিংগী নূমীৎ থৌরম ইম্ফাল ইষ্ট দিষ্ট্রিক্টকি লম্বোইখুলদা লৈরিবা ঈরৈমা ঈমাগী শঙলেন্দা চীঙ-লেম্না পাঙথোকখ্রে।

থৌরমদুদা সি আই টি য়ুগী সেক্রেটরি খেত্রিময়ূম সান্ত না হায়, মনিপুর য়াওনা আসামগী শরুকশিং খরা পূন্সিল্লগা পুর্বাঞ্চল ষ্টেট শেম্ননবগী শরৌ শীল্লকখিবা মতমদূগী লৈঙাক্লোয়শিংগী থৌরাংশিং য়ানিংদবা ফোঙদোক্তুনা লুচীঙপুরেল হিজম ইরাবতনা ইম্ফালগী য়াইস্কুলদা লৈরিবা মনিপুর দ্রমাটিক য়ুনিয়নগী হোলদা মীয়ামগী মীফম অমা কৌখি। মীফমদু য়াওবা লাকখিবা লম্লাই মায়কৈরোমগী লৌমী-শিন্মীশিং পুলিসনা পূঙদোংবমদা থত্তুনা অথীংবা পীননবা হোৎনরকপদগী লৌমী-শিন্মীশিং অদূগা ঈন্থোক- ঈন্সিন তৌনরকপদা পুলিস ওফিসার অমা শিখি। মতৌ অসূম্না এম দি য়ুগী মীফমসু কায়খি।

মদূদগী মীয়ামগী লূচীঙপুরেল হিজম ইরাবতসু মীরোৎ তাখি। মহাক্না লমদমসিগী লৌমী-শিন্মীশিং মীকপ থোকহনবিরম্বা নুমীৎ অমনি হায়বগীদমক চহী খূদীঙগী সেপ্তেম্বর ২১ অসীবু মনিপুর কনবা নুমীৎ অমসুং লৌমীশিংগী নূমীৎ থৌরম পাঙথোক্তুনা লাক্লি হায়খি। ইরাবতনা লৌমীশিংগী অন্দলোন লুচিংদুনা শক্লম্বা ঈশৈশিংদা য়ূম্ফম ওইবা জগোয়শিং নূপীমচাশিংনা খূত্থেক তমদুনা অয়েংবশিংগী মীৎয়েং চিংশিনখি। মহৈরোয়শিংনসু ঙরাংগী থৌরমদুদা থাঙ-তা খৌশাবা ঊৎখি।