ইম্ফালদা নেস্নেল ফার্মাসি চয়োল পালন পাঙথোকখ্রে

রেস্পোন্সিবল মেদিসিন য়ুজ অমসুং এ এম আর এৱ্যের্নেস হায়বা হীরমদা মনিপুরদসু নেস্নেল ফার্মাসি ৱীক,২০২৬ পালন থৌরম পাঙথোকখ্রে।
মনিপুর ষ্টেট ফীল্ম দেভলপমেন্ট সোসাইটি (এম এস এফ দি এস) ইম্ফালগী ওদিটোরিয়মদা ওক্টোবর ১৯ দা পাঙথোকখিবা থৌরম অদূ কংলৈপাক মেদিকেল এন্দ নর্সিং ইন্সটিট্যুটকি কোল্লেজ ওফ ফার্মাসি না শীনখিবনি। ন্যু দিল্লিদা লৈবা ফার্মাসি কাউন্সিল ওফ ইন্দিয়া (পি সি আই) গী মীৎয়েং মখাদা থৌরমদু পাঙথোকখি।
তোঙান তোঙানবা ইন্সটিট্যুট মাপন্দগী লাকপা পার্টিসিপেন্ট ১,৫০০ রোম্না শরুক য়াখিবা প্রোগ্ৰাম অদুদা ফার্মাসিষ্ট, হেল্থক্যের প্রোফেস্নেল, একাদেমিসিয়ান অমসুং ফার্মাসি তম্লিবা মহৈরোয় কয়া য়াওখি। থৌরম অদূ “তুংলমচৎতা হকচাং নাদা-য়েক্তনা লৈনবগীদমক ফার্মাসিষ্টশিংবু য়োকখৎপা” হায়বসিদা মরূ ওইবা মীৎয়েং থম্লগা পাঙথোকখি। মসিগা লোয়ননা ” স্বাস্থা ভারত: কোম্বেটিং এন্টিমাইক্রোবিয়েল রেজিস্টেন্স (এ এম আর)” হায়বসিদা ফোকস্ পীখি। অনাবা মীওইশিংবু খুদোংচাদবা কয়াদগী ঙাকথোকপা, দাইত্য খঙনা হীদাক শীজীন্নবা অমদি পব্লিক হেলথ কি মতাঙদা ফার্মাসিষ্ট শিংনা লৌরিবা থৌদাংশিংগী মতাংদা নৈনখি।
পি সি আই গী সেন্ট্রেল কাউন্সিল মেম্বর দা.শ্রিকান্ত বিজয়রাউ জোসিনা থৌরমদুদা হায়, ফার্মাসি তম্লিবা মহৈরোয়শিংনা একাদেমিয়া অমসুং ইন্দষ্ট্রি অনীগী মরক্তা লৈরিবা অহাঙবদু লৈহন্দনবা মখোয়না থিজিল্লিবা কয়াদু মীয়ামদা ঊৎতুনা খঙহনগদবনি। অপদেট তৌরবা হৌজিক মতমগী ফার্মাসি করিক্যুলমগী মতাঙ, টেক্নোলোজি চাওখৎলকপগী মতাং, এ আইগী মতাং অমদি পেসেন্ট কম্যুনিকেসন স্কিলনচিংবগী মতাংদা মহাক্না ফোঙদোকখি।
পি সি আই গী ভাইস প্রেসিদেন্ট জসুভাই হিরাভাই চোধরি না থৌরমদুদা অথোয়বা মীথূঙলেন ওইনা শরূক য়াখি। দিগনিটরি কয়াসু প্রোগ্ৰাম অদুদা শরূক য়ারদুনা ৱা ঙাঙখি।