চিন -কুকিশিংনা চত্থরকপা হীংশাগী ঈরাংদা মীশী-মীনাগী অচৌবা চৈথেং মায়োক্নদুনা লৈরিবা মৈতৈ অমসুং নাগা কাঙলূপ অনীগী মৈরা পায়বী লূপশিংনা পূন্সীন্দুনা, এপেক্স বোদী অমগী মখাদা ইস্যু পূম্নমক থেংনমিন্ননবা অমত্তা ওইবা ৱারেপ লৌখ্রে। হৌখিবা থাংজা নুমীৎকি নুংথিলদা ইম্ফাল ৱেষ্ট দিষ্ট্রিক্টকি মনূঙচন্না অৱাং সেকমাইদা লৈবা এদভান্স ৱিমেন সোসাইটি, অপূনবা মৈরা পায়বী অৱাং সেকমাইগী প্রসিদেন্ট ইমা উশম অমুবিগী য়ূমদা নাগা অমদি মৈতৈ ফূরূপকি খুঙ্গং ১৪ গী মৈরা লূপশিংগী ওইবা অপুনবা মীফম অমা পাঙথোক্তুনা ৱারেপ অদূ লৌখিবনি।
অমত্তা ওইনা লেপমিন্নদুনা ইস্যু পূম্নমক্তা হনবা নাইদনা থেংনমিন্নগদৌরিবা খুঙ্গংশিং অদুদি, অৱাং পোৎশঙবম খুল্লেন, তেন্দোংয়ান, অৱাং সেকমাই, কান্তো সাবল, মহারাবি, শান্তিপুর, তীংগ্ৰী,খূরখূল, কান্তো, লৈকিন্থবী, মখান লিয়াংমাই ভিল্লেজ, কংলাতোংবি, মপাও অমদি নমদিলোং ভিল্লেজনি। মসীগী মতাঙদা ঈমা অমনা পাউমীশিংদা হায়, তঙদূ লৈতাদ্রবা হৌজিক্কি ওইরক্লিবা ফীভমশিং অসীদা য়েলহৌমী ওইনা লৈরিবা মৈতৈ অমসুং নাগা ফূরূপকি তুংলমচৎ অসী তম্বা ঙমদবা ফীভম অমদা লৈরক্লি।
পাল্লিবা লৈঙাক অসীনা মতীক-ময়ায় লৈনা, নূপা থোক্না সাসন তৌরক্তবদগী কুকিশিংনা লান্দাদুনা য়েলহৌমী মীচম কয়াগী মমল নাইদ্রবা, তাঙলবা পুন্সি খাঙূথক্তা পিখম্নহনখিবনি। লৈঙাক অসীনা মতীং থোক্না মথৌ পাঙথোকপা ঙম্লক্তবা মরম্না নাগা অমসুং মৈতৈ অনীগী মৈরা পায়বীশিংনা অমত্তা ওইনা পুন্দুনা লমদম অসীগী ইস্যু খূদীঙমক থেংনমিন্ননবা ৱারেপ লৌখিবনি হায়খি।
You may also like
-
নোংমাইলেম্বিনা মিলালগী লূচীংপুরেল ওইরে
-
স্পোট পেন্টীং কম্পিটিসন, ক্বিজগী থৌরম পাঙথোকখ্রে
-
নেস্নেল হায়ৱে-৩৭ দা লম্বী চৎপা য়ারমদবদু শেংদোকখ্রে, গারিশিং চৎপা হৌখ্রে
-
থাঙ-তা মশান্না অসী ওলেম্পিক গেম্সতা য়াওহন্দুনা শান্নরোয়শিংদা কান্নবা পীবা য়াই: প্রেমকুমার
-
লৈঙাক অমা নীংথিনা চল্লাইনবা হোৎনবদা মেদিয়াগী অচৌবা থৌদাং লৈ: চরঞ্জিৎ