কোকোমিগী থৌমী ময়েংবম সোমোর্জিৎ মীয়াম্না ফূরকপদগী রাজ মেদিসিটিদা পুখত্তুনা লায়কন্নখ্রে

চৎলিবা এপ্রিল থা অসীগী ২৫ দা কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) গী লমজীঙ মখাদা মশীঙ য়াম্লবা মীয়াম্না ষ্টেট লৈঙাক্কি মফমদা ৱাহং তরুক হংবগী অচৌবা খোঙচৎ অমা চত্তুনা চিফ মিনিষ্টরদা মেমোরেন্দম অমা পীশীনখিবা নুমিৎ অদুমক্তদা খ্বাইরম্বন্দ কৈথেলদা নহা খরনা তমথীনা ফূরকখিবা কোকোমিগী মরূওইবা থৌমী ময়েংবম সোমোর্জিৎ হৌজিক ইম্ফালগী নোর্থ এ ও সিদা লৈবা রাজ মেদিসিটিদা লায়েংদুনা লৈরি।
খ্বাইরম্বম কৈথেলদা পোৎফম ফম্বী নূপী খরনা কোকোমিগী থৌমীশিং শেল চারগা মীয়ামগী মরূওইরবা খোঙচৎ অদূ ৱাহন্থোক লৈহন্দ্রে হায়না সোসিয়েল মেদিয়াদা ফোঙদোক্নরকখি হায়বা ৱাহৌদা নিঙাই শংদান্নরকপদগী থৌদোক অদূ থোকখিবনি হায়রি। ময়েঙবম সোমোর্জিৎ না পাউমীশিংদা ফোঙদোরকখিবা মতূঙ ইন্না, মহাক্কি করি মরালনো অদুগা কোকোমিগী মরালনা করিনো হায়না হংখিবগা লোয়ননা খ্বাইরম্বন্দ কৈথেলদা মমা শাবিগী মায়খূম ঊপ্পা পোৎফম ফম্বী খরা য়াওরি, মখোয়না মোব শাগৎলকপদগী থোকহন্নিংদবা থৌদোক অদূ থোকখিবনি হায়খি।
মায়খূম ঊপ্লগা মীয়ামগী মমা শাবী অমা থোক্লক্লগা মহাক্কি মশম পায়দুনা চিংথোক্লগা মোব শাগত্তুনা লৈরিবা নহারোল খরদা শিন্নদুনা মহাকপু ফূহনবগী মথক্তা কৈথেল ফম্বী, ঈমাগী মায়খূম ঊপ্পি খরসু য়াওশিল্লক্তুনা মহাকপু ফূবদা য়াওশীল্লকখিবনি হায়না সোমোর্জিৎনা মখা তাখি। মহাক মশামক কুমশিং ২০০৮ দগী দেসামদা য়াওরক্তুনা মহৈরোয়শিংগী চাওখৎ থৌরাংগা মরী লৈনবা থবক-থৌরমশিংদা মাঙজীল থানা চেন-চোংদুনা লাকপগী মথক্তা মহৈরোয় লূপ অসীগী প্রেসিদেন্ট ওইনসু থৌ পুরকখিবনি হায়খি।
নাকল অমরোমদা, কোকোমি ষ্টূদেন্টস ৱিংনসু লূপ অসীগী মরূওইবা থৌমী অমা ওইরিবা সোমোর্জিৎতা খূৎ থাদুনা অশোক-অপন নংহনখিবা মীওইশিং ফাগৎলগা চৈরাক পীগনি হায়না ফোঙদোরক্লি।