কোকোমিগী অথীংবা মরক্তা সেক্যুরিটিগী চেকশীন থৌরাং লৌখত্তুনা খোংজোম ডে থৌরম পাঙথোকখ্রে

কোকোমি অমদি মীয়াম্না অকনবা খোঙজঙ চঙশীন্দুনা, মনিপুর লৈঙাক্কি লুচিংবশিং খোংজোম ডে থৌরমদা অথীংবা থমদুনা শরুক য়াহন্দনবা হোৎনরবসু সেক্যুরিটি ফোর্সনা অকনবা চেকশিন থৌরাং লৌখত্তুনা ঙরাং মনিপুরগী গভর্নর অজয় কুমার ভাল্লা অমসুং চিফ মিনিষ্টর য়ূম্নাম খেমচান্দ অনীনা লুচিংদুনা, মশীঙ য়াম্লবা মীয়াম শরূক য়ারদুনা খোংজোমগী লানফমদা থৌনা ফনা থৱায়না পোন্থা পীখ্রবা অথৌবা ঈপা ঈপূশিংগী মফমদা হৈকৎ-লৈকৎ তমদুনা ইকায়খুম্নবা উৎখ্রে।
খোংজোমদা শোক্নখিবা এঙ্গলো-মনিপুরি ৱার অদুগী অরোয়বা নুমিৎ ওইখিবা এপ্রিল ২৩ দা মনিপুর লৈঙাক্না শীন্দুনা চহী খূদীঙগী মফম অদুদা লৈরিবা খেবা চীঙগী চীঙখোঙদা লৈবা খোংজোম ৱার মেমোরিয়েল কমপ্লেক্সতা খোংজোম ডেগী থৌরম পাঙথোক্তুনা লাকপগুম, ঙরাংসু মনিপুর লৈঙাক্না শীন্দুনা থৌরম অদু মপূঙ ফানা পাঙথোকখি।
অথৌবা পাউনা ব্রজবাসীগী মিতমদসু মনিপুরগী গভর্নর অজয় কুমার ভাল্লানা লুচিংদুনা মীয়াম্না হৈকৎ-লৈকৎ তমদুনা ইকায়খুম্নবা ঊৎখি। খোংজোম লানফম অসীনা ঐখোয়গী খুন্নাইদা মরৈবাক-মরমদম নুংশিবগী ময়েক লারবা খূদম-চাংদম অমা ওইনা লৈরি। মনিপুরদা নুংশিনবা,ঈং-তপ্পা শক্তম হঞ্জিলহন্সি হায়রবদি কাঙলূপশিংগী মরক্তা পূকচেল তিন্ননা, পূন্না, অমত্তা ওইনা থবক পায়খৎমিন্নবগী তঙায়ফদবা লৈরি হায়না গভর্নরনা ফোঙদোকখি।
চিফ মিনিষ্টর য়ূম্নাম খেমচান্দনা ফোঙদোকখিবা মতূঙ ইন্না, মীয়াম্না হৌজিক চঙশীল্লিবা খোঙজঙশিং অসী লৈঙাক্না ঈকায় খুম্নৈ। তৌবতবু খোঙজঙ চঙশীনবদা ঐখোয় মশেল মরক্তা মূক্নবা মানবা থৌওংশিংদি য়ারিবমখৈ চত্থবিগনু। ট্রোংলাউবিদা হন্দক থোকখিবা থৌদোকসি খ্বাইদগী লাইবক থীবা, মনিপুরগী পুৱারিদা খক কাউঙম্লরোইদবা অমনি।মরাল লৈবশিং অদূ ফাগত্তুনা অকনবা চৈরাক পীননবা ষ্টেট লৈঙাক্কি মায়কৈদগী য়াম্না কন্না হোৎনরি। মসীদা মীয়াম্নসু কো-ওপরেসন পীবিয়ু হায়না চিফ মিনিষ্টরনা মীয়ামদা আপিল তৌখি।