ককচীঙগী মচীন-মনাও চীঙদা লৈবা অথৌবশিংগী খুভমদা হৈকৎ-লৈকৎ তমখ্রে

ঈং কুমশিং ১৮৯১ গী এপ্রিল ২৩ দা ব্রিটিশকা শোক্নখিবা খোংজোমগী অরোয়বা লানফমদা, শোয়দনমক শিরগনি অমসুং মায়থীরগনি হায়বা খঙলবসু মরমদম -মরৈবাককিদমক শিবা কিদে হায়বদু ঊত্তুনা, নুমিৎ তাবা লৈতে হায়নখিবা,চাউরবা ব্রিটিশকি মশীঙ য়াম্লবা লান্মিশিংগা লম্বা পারম্লবা মতূঙদা থৌনা ফনা, নোক্না -নোক্না মরৈবাক্কিদমক থৱায় কৎখ্রবা অথৌবশিংগী মফমদা মনিপুরিশিংনা ঙরাং পাক সন্না থৌরম পাঙথোক্তুনা হৈকৎ-লৈকৎ তম্নখ্রে। চিফ মিনিষ্টর য়ূম্নাম খেমচান্দ, গভর্নর অজয় কুমার ভাল্লা অনীনা লুচিংদুনা খোংজোমগী খেব চীঙদা মীয়াম্না চত্তুনা মরৈবাক্কিদমক থৱায় থাখ্রবা অথৌবশিংগী মফমদা হৈকৎ-লৈকৎ তমদুনা ইকায়খুম্নবা ঊৎখি।অথৌবা পাউনা ব্রজবাসিগী মীতমদসু হৈকৎ-লৈকৎ তমদুনা ইকায়খুম্নবা ঊৎখি।

ককচীঙদা লৈরিবা মচীন-মনাও চীঙদা জষ্টিস কম্মিটিগী চ্যেরমেন জয়চন্দ্র কোন্থৌজমনা লুচিংবা মীওই কয়ানা ঙরাং অয়ূক অঙনবদা চত্তুনা হৈকৎ-লৈকৎ তমখি।ঈপা ঈপূশিংগী ঈখেঙতনা চামথোক্লবা ঈরমদম্নি।মশক খঙহৌবা অমদি খঙহৌদ্রবা ঈপা-ঈপূশিং অদূনা, মীখা পোনগদবগী শরূক, মীথীবোঙ-মিতম্বাল ওইনা লৈগদবগী মহূৎ য়েক্নবা খরা হাৎলম্লগা শিখিবনা শরূক চাম্মা হেন্না ফৈ হায়বা মথৌনা -মরীঙজেল অদূ ঙসীসু লৈহৌরিবা মচা-মশূ ওইবা ঐখোয়গী ঈ দা, লূ-তোংদা অদুম্মক য়াওরি।ঐখোয় হিংলিঙৈদা মনিপুর মচেৎ তাবা কৈদৌনুংদা য়াহল্লোই হায়বা ৱাফম জয়চন্দ্রনা ফোঙদোকখি।

নাকল অমরোমদা, এম পি সি সিনা শীন্দুনা ইম্ফালগী কংগ্ৰেস ভবন্দসু, খোংজোম লান্দা থৱায় কৎখ্রবা অথৌবশিংগী মফমদা হৈকৎ-লৈকৎ তমদুনা ইকায়খুম্নবা ঊৎখি।