থৌবাল দিষ্ট্রিক্টকি মনূঙচন্না অন অথোরাইজ ওইনা হাংলম্বা হেল্থ ইন্সটিট্যুসন ১৯ থিংজিনখ্রে

থৌবাল দিষ্ট্রিক্টকি তোঙান তোঙানবা মফমশিংদা রেজিষ্টর তৌদনা, আইনগী ৱাংমদা হাংলম্বা প্রাইভেট হেল্থক্যের ইন্সটিট্যুট অমদি ক্লিনিক ১৯ খূদক্তগী থিংজিনখ্রে। চহী অসীগী মার্চ থাদা থোকখিবা ষ্টেট হেল্থ সার্বিসেস দিরেক্তরেটকি ওর্দর মতূঙ ইন্না, রেজিষ্টর তৌদবা হেল্থ ইন্সটিট্যুসনশিং অমসুং ক্লিনিকশিংনা হৌজিক চৎলিবা জূলাই থা অসীগী ১৫ ফাওবদা রেজিষ্টর তৌগদবনি হায়না য়াম্না মাঙজৌননা খঙহনবসু লৈখ্রবনি হায়না থৌবাল দিষ্ট্রিক্টকি চিফ মেদিকেল ওফিসার (সি এম ও) দা. ক্রিষ্ণচন্দ্র লূৱাঙনা ঙরাং মহাক্কি ওফিস চেম্বরদা পাঙথোকপা প্রেস মিট অমদা পাউমীশিংদা ফোঙদোকখি।

প্রাইভেট হেল্থ ইন্সটিট্যুসন অমসুং প্রাইভেট ক্লিনিকশিংনা মীয়ামগী থৌগল তৌবিগে, আইন্না য়ারবা মওংদা চল্লাইরগে হায়বা তারবদি তঙায়ফদনা মনিপুর নর্সিং হোম্স এন্দ ক্লিনিক্স রেজিষ্ট্রেসন এক্ট, ১৯৯২ অমদি মসীগী রুল্স ১৯৯৩ গী মখাদা রেজিষ্টর তৌদবা য়াদে।

চৎলিবা জুলাই থা অসীগী ১৫ দগী হৌনা থৌবাল দিষ্ট্রিক্ট কি দেপ্যুটি কম্মিস্নার অমসুং মনিপুর লৈঙাক্কি হেল্থ সার্বিসেসকি দিরেক্টরগী ইন্সট্রক্সন মখাদা সি এম ও থৌবালনা মনিপুর পুলিসকা লোয়ননা দিষ্ট্রিক্ট অসীগী লিলোং, য়াইরিপোক, প্রোপর থৌবাল অমদি ৱাংজিংগী অকো‌য়বা মফমশিংদা দ্রাইব চত্থরকপদা, প্রাইভেট হেল্থক্যের ইন্সটিট্যুট অমদি ক্লিনিক পূন্না ৩৩ চেক তৌবা মতমদা মখোয় ১৪ দি রেজিষ্ট্রেসন ফংলে হায়বগী দোক্যুমেন্টশিং পুথোকপা ঙম্বদগী মখাতানা চল্লাইনবা অয়াবা পীখ্রে অদূগা অসীগুম্বা প্রাইভেৎ হেল্থ সেন্টর ১৯ দি রেজিষ্ট্রেসন ফংদ্রিফাওবা হাংবা য়ারোই হায়না অথীংবা থমখ্রে হায়খি। দ্রাইব চত্থবা অদুদা মতেং পাংবিরকখিবা মীওইশিংদা সি এম ও দা.ক্রিষ্ণচন্দ্র লূৱখংনা থাগৎপা ফোংদোকখি।