কেবিন ক্রূ ঙান্থোই শর্মগী মশক খঙদোক্ননবা দি এন এ প্রূফিংদা মতেং পাংলুনবা পোকমীন্নবি মচে অহম্মেদবাদ য়ৌখ্রে

চৎলিবা জূন থা অসীগী ১২ গী নুংথিলদা য়াম্না লাইবক থীবা থৌদোক অমদা লন্দন য়ৌননবা এয়রপোর্টতগী পাইখৎখিবা এয়র ইন্দিয়াগী বোয়িং ৭৮৭ পোকখায়দুনা কায়খিবা থৌদোক্তা লৈখিদ্রবী মনিপুরদগী কেবিন ক্রূ মেম্বর কোংব্রাইলাৎপম ঙান্থোই শর্মগী হকচাং য়াওনা থৌদোক্তুদা লৈখিদ্রবা মীওই খূদিংমক্কি মশক খঙবা ঙমদ্রবা হকচাঙশিং মশক খঙদোক্ননবা দি এন এ প্রূফীং চত্থবা হৌখ্রে। হায়রিবা থবক থৌরমদুদা মতেং পাংদুনা মনাওনুপীগী মশক তাক্লুনবা ঙান্থোইগী পোকমিন্ন বী মচে অহম্মেদবাদতা থুংখ্রে।

এয়র ইন্দিয়াগী মায়কৈদগী ঙান্থোই লৈখিদবগী ৱাফম অসীগী মতাঙদা ওফিসিয়েল ওইনা খঙহল্লকপা লৈত্রবসু হন্দক্কি লাইবক থীবা থৌদোক অদুদা ঙান্থোই শর্ম লৈখিদ্রে হায়বসিমদি ঈমূঙ-মনূঙগী মীওইশিংনা কনফার্ম তৌখ্রে। বোয়িং অদুদা তোংখিবা অপূনবা মীওই ২৪২ গী মনূঙদা মীওই ২৪১ লৈখিদবনি অদুগা মীওই অমনা অরুবা ফিভমদা শোক্তুনা হৌজিক হোস্পিটালদা লায়কন্নদুনা লৈরিবনি। অশীবা মীওইশিং অদূগী মনূঙদা মমায়দা শোকহৌদবনা ঈমূঙ-মনূঙগী মীওইশিংনা মশক খঙবা ঙমখ্রবা মীওই ৬ তি মশা- মশাগী ঈমূঙ-মনূঙগী মীওইশিংদা শিন্নখ্রে। ঙান্থোই গী হকচাং মশক খঙদোক্ননবা দি এন এ টেষ্ট তৌননবগীদমক মহাক্কি পোকমিন্নবী মচেদগী সেম্পলশিংসু অহম্মেদবাদ তা লৈরিবা অথোরিটিনা লৌখ্রে।

ঙান্থোইগা লোয়ননা মনিপুরগী কাংপোকপী দিষ্ট্রিক্ট তগী লাংনুংথেন সিংশোন (২৮) সু লাইবক থীবা থৌদোক্তুদা লৈখিদবনি। মহাকসু বোয়িং অদুদা ক্রু মেম্বর ওইবনি। ঙান্থোইনা থৌদোক থোকখিবা নুমিত্তুগী অয়ুক পূঙ ১১.৩০ তাবদা মচেদা ফোন তৌরক্লগা, মহাক লন্দন্দা চৎকদৌরে, মরকতা ফোন কোল তৌরকপা য়াররোই, ফাওনররোই, জূন ১৫ দা মহাক হল্লক্লবা মতূঙদা পাউ অমুক ফাওনরসি হায়রমখি হায়রি। মদূনা মহাক্কি পুন্সিগী অরোয়বা খোঞ্জেল ওইখ্রে হায়না ঙান্থোইগী অপোকপা নন্দেশ কুমার শর্মনা নীঙমদনা ফোঙদোরকখি।