মৈরা পায়বীশিং মৈ হৌনা শাউবা য়াওনরে, অকনবা সিট- ইন-প্রোটেষ্ট চত্থখ্রে

মমাঙ চহীগী দিসেম্বর ১৪ দা ষ্টেট পুলিশ কম্মান্দো টিম অমনা খুল ঙাকপা ভিল্লেজ ভল্লন্টিয়র অমা নোংমৈনা কাপ্তুনা হাৎখিবা অমসুং অতৈ ভিল্লেজ ভল্লন্টিয়র ৬ না ফাজিনখ্রবা মতূঙদা ঙসীফাওবা থাদোরক্তবদগী মৈরা পায়বী ঈমাশিংনা পাক সন্না মফম কয়াদা সিট- ইন- প্রোটেষ্টকি খোঙজঙ চত্থদুনা লাক্লি। মনিপুর পুলিসকি থৌওংশিংদা মৈরা পায়বী ঈমাশিংনা নোংমা নোংমগী মৈ হৌনা শাউবা হেঙ্গৎলক্লে। অকনবা খোল্লাউশিংগা লোয়ননা ঙসী-ঙসীমকসু মফম কয়াদা ৱাকৎ মীফম অমসুং য়ানীঙদবগী খোঙচৎ কয়ামরুম চঙশীন্নরি।

খোঙজঙ অসীগী মনূং চন্না ঙরাং জানুয়ারি ২০ দসু বিষ্ণুপুর দিষ্ট্রিক্ট কি মনূং চন্না লৈরিবা থাঙ্গ থোংখাদা ওল থাঙ্গ অপূনবা মৈরা পায়বী লূপ্না শীন্দুনা মনিপুর পুলিসকি থৌওংশিংদা য়ানীঙদবা ফোঙদোক্তুনা সিট- ইন- প্রোটেষ্ট চত্থখ্রে। কুকি মিলিটেন্ট শিংনা মৈতৈ ফূরুপতা ওন্সীন্দুনা নূপী অঙাঙশিং য়াওনা মীওই চা কয়া হাৎলক্লবসু কুম্মৈ অমগুম য়েংদুনা, নোংমৈ মরূ অমফাওবা কুকি মিলিটেন্ট শিংদা কাপ্তুনা ফাবা, হাৎপা ঙমদ্রিবা মনিপুর পুলিসকি কম্মান্দো শিংনা ঐখোয়গী মীয়াম অসীগী পুন্সি অমসুং লন- থুম ঙাক্লিবা ভিল্লেজ ভল্লন্টিয়রশিংদা নোংমৈ মতোল ওন্সীনবা অসী মমা ওইবিশিংনা খক য়াবা ঙম্লোই, মসিদা খাঙদুনা, তূমিন্না য়েংদুনা লৈথোক্লোই হায়না ঈমাশিং অদূনা ফোঙদোকখি।

খুল ঙাকপা হাৎলিবা অমসুং ফারিবা পুলিস কম্মান্দোশিংগী মথক্তা আইনগী অকনবা থবক লৌখত্তুনা মতীকচাবা চৈরাক পীগদবনি, মখোয়বু খূদক্তা থবক্তগী দিসমিস তৌগদবনি হায়বা দাবী কয়া ঈমাশিংনা তান্দুনা ষ্টেট লৈঙাক্তা তকশীনখি।