চাইনানা ৬শুবা জেনরেসনগী ফাইটর জেট টেষ্ট-ফ্লাই পাঙথোকখ্রে, ইন্দিয়াসু খুদোংচাবা অসী লৌননবা ওফর অনী ফংলে, ন্যু দিল্লিনদি অয়াবা পীদ্রি

হন্দক চাইনানা, মশানা শাজবা ৬ শুবা জেনরেসনগী ফাইটর জেট টেষ্ট- ফ্লাই তৌরকখিবা অসীনা মালেমগী সেক্যুরিটি অমসুং দিফেন্স সার্কলদা চাউনা অকিবা অমা পীরকখ্রে। থোইদোক-হেন্দোক্না ঙমখৈগী মতাংদা য়াম্না কন্না উংখৎনরগা অচেংবা তাঞ্জা য়েংনদুনা লৈরিবা য়ূম্লোন্নরিবা ইন্দিয়াদা চাইনানা চত্থরক্লিবা থৌওং অসীনা টেন্সন হেন্না লৈহন্নবগী মরমসু ওইহল্লক্লি। হৌজিক ইন্দিয়ানা চাইনা অমসুং পাকিষ্টান হায়রিবা য়ূমথঙনরিবা লৈবাক অনী অসীগা ক্রক-ক্রক য়েংশিন্নদুনা য়াম্না য়েংথীনদুনা লৈরক্লিবনি। চৈরক অসীদা, ইন্দিয়াসু ৬শুবা ফাইটর জেট পুথোক্নবগী গ্লোবেল প্রোজেক্ট তা পার্টনর অমা ওইননবা তোঙান-তোঙানবা গ্ৰুপ অনিদগী ওফর অনী ফংলে।

৫শুবা জেনরেসনগী ফাইটর জেট মশীংফাওবা ইন্দিয়াগী ওইনদি য়াম্না মশীং হন্থনা লৈরিবনি। শুপ্নগী অমা-অনীদগী হেন্দ্রিবনি হায়রি। চৈরকশিদা জর্মনি, ফ্রান্স অমসুং স্পেনগী অপূনবা সিক্স জেনরেসনগী ফাইটর জেট প্রোজেক্ট তা ইন্দিয়াসু পার্টনর অমা ওইনবা ওফর তৌরকখ্রে। মখোয়গী ফ্যুচর কোম্বেট এয়র সিষ্টেম ( এফ সি এ এস) প্রোগ্রাম দা পার্টনর অমা ওইনবা ওফর তৌরক্লিবনি। অদুগা নাকল অমরোমদা, য়ু কে, জাপান অমসুং ইটালিনসু মখোয়গী গ্লোবেল কোম্বেট এয়র প্রোগ্রাম (জি সি এ পি) দা পার্টনর অমা ওইনবা ইন্দিয়াদা ওফর পীরকখ্রে। ঙসীদি ইন্দিয়া অসী য়াম্না মরুওইবা দিফেন্স কোল্লাবোরেটর অমা ওইনবগী মিংচৎ ফংবা ঙম্লে হায়বদা লাল্ল রোই।

ইন্দিয়াসু মশাগী এদভান্স মেদিয়ম কোম্বেট এয়র ক্রাফট ( অমকা) প্রোজেক্ট পায়খৎলিবনি। দি আর দি ও অমসুং ইন্দিয়ান এয়রফোর্স না পূন্না পায়খৎমিন্নবনি। লাক্লিবা কুমশিং ২০৪০ ফাওবদা অতোপ্পা মপানগী লৈবাক অমত্তগী মতেং লৌদনা ৬শুবা জেনরেসনগী ফাইটর জেট পুথোক্ননবা থৌরাং তৌরিবনি।