য়াইরিপোক মায়কৈদা মীয়াম্না লৈঙাক্কি ওফিস ছো লোন্সীনখ্রে, মহৌশাগী পুন্সিদা চাউনা অকায়বা পীরে

বিষ্ণুপুর দিষ্ট্রিক্টকি মনূঙচন্না লৈরিবা ট্রোংলাউবী অৱাং লৈকায়দা লৈবা ঈমূঙ অমদা কুকি মিলিটেন্টশিংনা বোম কাপশীন্দূনা নৌরিবা অঙাং অনী হাৎখিবা অমসুং মখোয়গী অপোকপী মমাবু তমথীনা শোকহনখিবা থৌদোক অদূগী মতাঙদা শেমখিবা জে এ সীনা মনিপুর পূম্বদা চত্থরিবা নুমীৎ মঙানীগী টোটেল সটদাওন অসী ঙরাং ফাওবদা নুমীৎ নীনী চনখ্রে।
হৌজিকসু স্কুলশিং অমত্তা থোঙ হাংনদ্রি।লম্বীদা গারি মচা খরা মশীঙ য়ামদনা চৎপা উরবসু পেসেঞ্জর গারি অমত্তা চৎনদ্রে। দুকান অমদি কৈথেল অয়াম্বা হাংনখিদ্রে।খুন্তাক-লান্সিবগী শক্তম উবা ফংলি।
য়াইরিপোক মায়কৈদা মীয়াম্না লৈঙাক্কি ওফিস খূদীঙমক থোঙ লোন্সীনবগী দ্রাইব অমসু ঙরাং চঙশীনখি।ইমপ্লোয়ি খরদি ওফিসকি মপান্দা থোকপা নংহৌদবদগী চরাঙনবা কয়াসু মায়োক্নখ্রে।
চৈরকশিদা য়ুনাইটেদ নাগা কাউন্সিলনা হৌখিবা অহীঙ নোংয়াই দগী এপ্রিল ২৩ গী অহীঙ নোংয়াই ফাওবা, নুমিৎ হুম্নি চূপ্না, নাগাশিংনা নম্না খুন্দারিবা দিষ্ট্রিক্ট শিংদা টোটেল সটদাওন লাউথোক্তুনা খোঙজঙ চঙশীনবসু হৌখ্রে। চৎলিবা এপ্রিল থা অসীগী ১৮ দা ইম্ফাল – উখ্রূল লম্বীগী টি এম কসোম ভিল্লেজ মনাক্তা মিলিটেন্টশিংনা নোংমৈ কাপশীন্দুনা তাঙ্খুল নাগা ফূরুপকি মীওই অনী হাৎখিবা, অদুগা মীওই কয়ামরুম শোকহনখিবা থৌদোক অদূবু য়ানিংদবা ফোঙদোক্তুনা সটদাওন গী খোঙজঙ অসী চঙশীনখিবনি।
মসিগী মথক্তা কুকি-জো কাঙলূপ্নসু লাক্লিবা এপ্রিল ২২ দা নোংমগী ওইনা মনিপুর পূম্বদা টোটেল সটদাওন চত্থরগনি হায়না লাউথোকখ্রে।লৈখিদ্রবা থানলোন কেন্দ্রগী এম এল এ ভুংজাগিন বাল্টে দা এত্তেক চত্থরকখিবা থৌদোক অদুবু য়ানীংদবা ফোঙদোক্তুনা খোঙজঙ অসী চঙশীনগদবনি হায়রি।