দা. রিতাবু তমথীনা হাত্তোক্লম্বগী মায়োক্তা মীয়াম্না ৱাকৎ মীফম চত্থখ্রে

ইম্ফাল পুলিশ ষ্টেসনগী মনূঙচন্না য়াইস্কুল চীঙাখম লৈরক্তা লৈবা, সেনিয়র ফিজিওথেরাপিষ্ট অমা ওইনা রিমস হোস্পিটালদগী থবক্তগী পোত্থারবী অঙোম নিঙোল আসেম ওঙবী দাক্তর রিতা (৬৭) বু চৎলিবা ওক্তোবর থা অসীগী ১৩ গী নুংথিল পোবোপ্তা, কনাসু লৈতবা অচেংবা তাঞ্জাদা মশামক্কি ময়ূমদা শকখঙদবশিংনা চঙশীল্লক্লগা য়াম্না মিনুংশি য়াওদনা তমথিবা মীহাত্তা হাৎতোকপিরমখিবা থৌওং অদূবু অকনবা মওংদা য়ানিংদবা ফোঙদোক্তুনা মীয়াম্না ৱাকৎ মীফম পাঙথোক্তুনা প্রোটেষ্ট তৌখ্রে।
ঙরাং য়াইস্কুল অপূনবা মৈরা লূপ অমসুং মায়কৈ অদোমগী ভল্লন্টরি ক্লব ৮ গী অপূনবা বোদি অমা ওইনা লৈরিবা য়ুনাইটেদ ক্লব ওফ য়াইস্কুলনা খূৎশম্নদুনা দা. রিতা, মপূরোইবগী মিংনা আসেম মুহিন্দ্রো, গী মীহাৎপু খম থেংনা কন্দেম তৌরদুনা অকনবা প্রোটেষ্ট তৌখি। মীয়ামগী সেবা মপুন্সি কত্থোক্তুনা লাকখ্রবী দাক্তর নূপী অমবু নুংথিল পোবোপ্তা, য়ূমগী অতৈ মীওই অমত্তা লৈতবা তাঞ্জাদা,মশামক্কি য়ূমদা শকখঙদবশিংনা চঙশীল্লক্লগা য়াম্না মিনুংশি য়াওদনা তমথিবা মীহাত্তা হাৎতোকপিরমখিবা থৌওং অসী মীওইবা খুন্নাইগী শাজৎ- লীচৎ নত্তে।

লম্লক্কি তমথিরবা, শাহীঙ চাবা জিবগা পাঙ্খক ওইরবা ফত্রবশিং অদু লৈঙাক্না অকনবা মীৎয়েং চঙদুনা ফাগৎপিয়ু অমসুং মতীক চাবা আইনগী চৈরাক ফংহল্লু হায়বা ৱাফম য়াইস্কুল অপূনবা মৈরা লূপকি কনভিনর আসেম ওঙবী মেমতোম্বীনা ফোঙদোকখি।য়ুনাইটেদ ক্লব ওফ য়াইস্কুলগী ভাইস প্রসিদেন্ট ওইরিবি সি ঐচ জমুনানসু চপ মান্নবা ৱাফম ফোঙদোক্তুনা, মরাল লৈবশিংগী মথক্তা লৈঙাক্না অথূবা মীৎয়েঙ চঙবিবগা লোয়ননা আইনগী মতূঙ ইন্না অকনবা দন্দি পিবিয়ু হায়না তকশীনখি।