ঙা মশীঙ খ্বায়দগী য়াম্না পুথোকপা ঙামীদা পীরম্বা শেনফম চাদা চাম্মা হেঙ্গৎখ্রে

মহৌশা মনিপুরগী খ্বায়দগী মরুওইবা নাৎকি ওইবা ফেষ্টিবেলশিংগী মনূঙদা মকোকথোংবা অমা ওইনা লৌনরিবা, চহীগী ওইনা হীয়াঙ্গৈ থাগী নীনী চনবদা পাঙথোক্তুনা লাক্লিবা, ময়ূম পানখ্রবী নীঙোলশিংবু মবূঙ-মৌপ্বা ওইবশিংনা চাক্কৌবগী থৌরম অমা ওইরিবা নীঙোল চাক্কৌবগী ফেষ্টিবেল অসীদা হন্দককি চহী অসীদগী হৌরগা চাক্কৌবা থৌরমগী নোংমা ৱাৎলিঙৈদা পাঙথোকপা ঙাগী মেলাদা ঙা মশীঙ খ্বায়দগী য়াম্না পুথোকপা ঙম্বা ঙামীদা পীবা রিৱার্দ মহৌশা লূপা লাখ অমা ওইরম্বা অদূগী চাদা চাম্মা হেঙ্গৎলগা লূপা লাখ অনী পীরগনি হায়না ষ্টেট লৈঙাক্কি ফীসরিজ লোয়শঙনা লাউথোকখ্রে।

চৎলিবা ওক্তোবর থা অসীগী চৈচৎ ২৩ দা নীঙোল চাক্কৌবগী থৌরম পাঙথোক্কদৌরিবা অসীগী নোংমা মাঙওইননা ওক্তোবর ২২ দা ইম্ফালগী পেলেস কম্পাউন্দা লৈরিবা হপ্তা কাঙজৈবূংদা ষ্টেটকি থাক্তা ঙাগী মেলা পাঙথোক্কদৌরি। মনিপুরদা হৌজিক থোক্লিবা পামদবা থৌদোক কয়া অসীনা মরম ওইদুনা মীয়ামগী শেন্থোক নেম্বা, শূফম- নোম্ফম লৈতবনা ঈমূঙ অয়াম্বা শেল-থুমগী খুদোংচাদবশিং মায়োক্নরিবা মরম্না ঙাগী মমলশিংদা মমাঙগী চহীশিংদা লেপখিবা মমলগী চাংদগী থোইনা অহোংবা লৈখিরোই হায়না ষ্টেট লৈঙাক্কি ফীসরিজ লোয়শঙনা ফোঙদোকখ্রে।

মনিপুরগী য়েলহৌ-ঙা খ্বায়দগী মরাঙ কায়না অমসুং মশীং য়াম্না পুথোকপা ঙম্বা ঙামীশিংদসু রিৱার্দ পীগনি। হন্দক্কি ওইনা অসীগুম্বা ঈরমদমগী য়েলহৌ-ঙা মশীং খ্বায়দগী য়াম্না পুথোকপা ঙম্বা ঙামীদা রিৱার্দ ওইনা শেনফম লূপা লীশীং ৫০  পীগদৌরি। কন্সোলেসন প্রাইজদনা লূপা লীশীং ২০/২০  পীরগনি হায়রি।মসীগীসু মথক্তা চীঙ অমসুং তমগী ঙা য়াম্না মরাঙ কায়না পুথোকপা মরী লৈনবা ফীসরিজ ওফিসারশিংদা লূপা লীশীং ৩০/৩০ সু পীদুনা পূক্নিং থৌগৎলগনি হায়রি।