লমদমসিগী অঙাং- অহল খাক্তনা লৈবাক নীঙবগী ৱাখল্লোন চেলহনবা মথৌ তাই : এম এল এ রামেশ্বর

মপান্দগী শিন্মী মশীঙ খঙদনা, লমদমসিগী লুচিংবনি হায়রিবশিং অসীনা পুশিল্লক্তুনা থবক শীজীন্নরকখিবনা, হৌজিক্তি শেল- থুমগী ফীভম কা হেন্না ফত্তনা লৈরক্লিবা ঈরমদম অসীদা ঐখোয়গী ঈচা- ঈনাওশিংনা মশাগী মরমদমদা থবক শুফম নোম্ফম লৈরক্তবনা মীয়ান মচাশিংগী থৌজালদা হিংবগী থাক অমা য়ৌশিল্লক্লে। পূম্নমক অসী মশাগীতা য়েংলগা থবক তৌবা, মমালৈবাক মরমদমগী করিমত্তা খন্থদবা, মীয়ামগী লুচিংবা শাবশিংনা থোকহল্লকপা ফীভমশিংনি হায়না কৈরাউ কেন্দ্রগী এম এল এ লৌরেম্বম রামেশ্বরনা ফোঙদোকখ্রে।

খোন্থাং ন্যুজনা শীন্দুনা ঙরাং হৈরাঙ্গোইথোং নিংথেমচা কারোংদা লৈবা জঙ্কসন রেষ্টোরেন্ট দা পাঙথোকখিবা লৈবাক নীঙবা শৈরেং শৈদিন্নবগী থৌরম অমদা এম এল এ না ৱাফম অসী ফোঙদোকখিবনি। অথৌবশিংগী খূয়াখাদা কচ্চবা হায়না মিংথোনবা থিমদা পাঙথোকখিবা থৌরম অদূ হৌদোকপদা অথোয়বা মীথূঙলেগী ৱারোল পীরদুনা রামেশ্বরনা মখাতানা হায়, ঈরমদম অসীগী পুৱারিগী লাতমশিং হাইদোক্তুনা য়েংলুবদা রামান্দি ধর্মা শন্দোকপা লাকখিবা শান্তদাস গোশাইনা চীঙ- তম নুংশিনদনবগী হূ কামশিল্লকখিবা মতমদুদগী হৌরগা নিংথৌ মচাশিংগী মরক্তা মরমদমগী, মীয়ামগী হায়বা ৱাফম তুংওইনরক্লগা মশা-মশাখক্কি য়েংনরকপদগী মনিপুর মীখা পোনবা তারকখি হায়বসি কক্নিঙায় য়াওদ্রবনি।

ঙসীনা অমুক বি জে পি লৈঙাক লাক্লগা মীয়াম খরা শাফরগনি খন্নরম্বদু চহী অনী-অহুম্লোম তম্পাক্কি মীয়াম চীঙদা চৎপা য়াহন্দ্রে। মীয়াম হৌজিক ৱাবনা খম থেংলে। মরম অসীনা ঐখোয় অঙাঙ- অহল হায়বা থিরুদনা অপূনবগী পাঙ্গল শাগৎলসি, ঈরমদম কন্ননবা হোৎনরসি হায়খি।