এফ আই আর কয়ারক পানগে হায়বনো পানবিয়ু, এন আর সি থবক্তা ওন্থোক্ট্রিফাও শিরবসু খোঙজঙদি হল্লোই: জিতেন্দ্র

সেন্টর অমদি মনিপুর লৈঙাক্না, এন আর সিগী খোঙজঙ চঙশীল্লিবা জে এফ দি অমসুং মীয়ামগী সেন্টিমেন্ট খঙশীন-উশিন্নদবা তৌরোইদবনি। জে এফ দিগী লুচিংবশিংগী য়ূমদা পুলিস কম্মান্দো থাজিন্দুনা মীয়ামগী ঈহৌ অসী মনীঙ হলহন্ননবা ধপ তৌবনা করিমত্তা কান্নবা পুরক্লোই। মনিপুর মীয়াম্না এন আর সি অপদেট তৌগদবনি হায়না তাল্লিবা দিমান্দশিং অসি য়াম্না ময়েক শেংঙি। মসীবু নাথৈহন্ননবা হোৎনবদি মালেমগী শক্তি অমত্তনা ঙমগদবা লৈতে। মনিপুর লৈঙাক্না পান্নিংবা এফ আই আর পাল্লু, মদুদা নীঙহন্নদুনা জে এফ দিনা কৈদৌনুংদা চেল্লরোই। মসিদি দূ ওর দাইগী খোঙজঙনি, ঈরমদমগী য়েলহৌমীশিংগী মরায়বক লেপকদৌরিবা খোঙজঙনি হায়বসি মরী লৈনবা পূম্নমক্না খঙজীনবিয়ু হায়না কেম্পেন ফোর জষ্ট এন্দ ফ্যের দিলিমিটেসন (জে এফ দি) গী কনভেনর জিতেন্দ্র নিঙোম্বনা অকনবা ৱাফম থমখ্রে।
পোরোম্পাৎ পুলিস ষ্টেসননা জে এফ দিগী কনভেনর অসীগী মথক্তা এফ আই আর অমা লৌখত্তুনা ঙরাং অয়ূক পূঙ ১০.৩০ তাবদা মশা লাক্ননবা কৌরকপদগী জিতেন্দ্র নিঙোম্বনা পুলিস স্টেসন অসীদা মশামক চত্তুনা ইম্ফাল ইষ্ট দিষ্ট্রিক্ট পুলিসকি এস পিগা ৱারী শানখি।
মদূগী মতুঙদা পাউমীশিংগা উনবদা মহাক্না হায়, মীয়ামগী ওইবা খোঙজঙ চত্থরকপা মতমদা য়ারিবমখৈ হীঙশা য়াওহন্দনবা অমদি মাঙজৌননা পুলিস অথোরিটিগা পাউ ফাওদোক্নরবা মতুঙদা খোঙজঙ চঙশীনবিনবা পুলিসকি মকোক থোংবশিংনা ফোঙদোরকখি।
মীয়ামগী খোঙজঙ অসীদি মনিপুর মীয়ামগীনি।পুলিসনা মতেঙ পাংশিনবিয়ু। এফ আই আর কয়া লৌখত্তুনা মহাকপু চাম্মরক ফাগৎলবসু কান্নবা লৈরোই, শিদ্রিফাওবা খোঙজঙ চঙশীনগনি হায়বা ৱাফম মহাক্না থম্লমখি হায়নসু জিতেন্দ্রনা পাউমীশিংদা ফোঙদোকখি।