হকচাংদা অনাবা অমা য়াওরকপদা লৈকায়গী মাইবা-মাইবিদা চেন্সীন্দুনা নোইহনবা, হকচাং মালিষ্ট তৌহনবা, চাংয়েং তৌদবা হীদাক-লাংথক শেমদুনা চাশীন-থকচিনবগী থৌওংসি য়ারিবমখৈ তৌবিরুনু। মদুনা হকচাংদা কা হেন্না অমাঙবা লাকহনবা য়াই, অদুগা লাইবক থীরবদি পুন্সী মাঙখিবসু য়াই হায়না মনিপুর মেদিকেল কাউন্সিলগী মায়কৈদগী মীয়ামদা চেকশীল ৱাফম থম্লক্লি।
অশোকপা মফমদু করম তৌরিবনো, কয়া য়াম্না হেঞ্জিল্লবগে, কদায় মফমদা শোক্লবনো হায়বদু তশেংনা খঙননবগীদমক সি টি স্কেন, এম আর আই অমদি অতৈ মখলগী টেষ্ট তৌবিয়ু। মদূগী মখা তাবা লায়েং নীঙথীনা চত্থবিয়ু। মদুদি তৌদবিদা, মাইবা মাইবী দা চত্তুনা মতম য়াম্না মাঙহল্লবা মতূঙদা উপাই লৈত্রে হায়দুনা দাক্তরদা, হোস্পিটালদা লাক্লবদি দাক্তরশিংদসু অৱাবা কয়া মায়োক্নৈ, অনাবদু থুনা ফগৎহনবা ঙম্লোই অদূগা অনাবগী ঈমূঙ-মনূঙদসু মতম অমসুং শেল হেন্না চঙহনগনি। লাইবক থীবদগী মীওই অদূ লৈখিদবা তারবদি দাক্তরনা থওইদবদগীনি অমুক হায়বিগদৌরিবনি। মরম অদুনা হকচাং নুঙাইরক্তবা ওইরবসু নত্রগা অতৈ অশোক-অপন ওইরবসু খূদক্তা হোস্পিটালদা য়ৌহৌনবা হোৎনবিয়ু হায়না মনিপুর মেদিকেল কাউন্সিল (এম এম সি) গী প্রসিদেন্ট দা. এল রঞ্জিৎনা মীয়ামদা খঙহল্লক্লি।
ৱাফম অসি লম্ফেলদা লৈবা এম এম সিগী ওফিস্তা পাঙথোকপা পাউগী মীফম অমদা দা. রঞ্জিৎনা য়ূমজাকৈশা নুমিত্তা ফোঙদোকখিবনি। লাইওং খঙদনা হীদাক থারগা মতৌ করম্না অনাবা ফগদৌরিবনো মেদিকেল সাইন্স কি লৌশিং ফংদবা মাইবা-মাইবিদা থৱায় লূপশীন্দুনা লৈবগী মতমদু ওইদ্রবনি হায়না মহাক্না ফোঙদোকখি।