সেক্সচুয়েল হরাসমেন্ট কেসকা মরী লৈননা মনিপুরদগী লোক সভাগী এম পি ওইনা লৈরিবা দা. অঙোমচা বিমোল অকোয়জমগী মথক্তা দিল্লি পুলিসনা এফ আই আর লৌখত্তুনা থিজিনবা হৌখিবগা লোয়ননা বিমোল অকোয়জম অসী ঙসী লাক্ননবা দিল্লি পুলিসনা ঙরাং সম্মোন তৌরকখ্রে।
জৱাহরলাল নেহেরু য়ুনিভর্সিটি (জে এন য়ু) গী অথোরিটিশিংনা কমপ্লেন্ট ফাইল তৌরকপদগী এফ আই আর অদূ লৌখৎখিবনি। মসীগী মতাঙদা মহাকপু শৌগৎপা মীয়াম অমসুং কংগ্ৰেস পার্টীগী থৌমীশিংনা কৈশামথোংদা লৈবা এম পি অসীগী য়ূমদা পূল্লবা মতূঙদা ইম্ফালগী নিত্যাইপাৎ চুথেক্তা লৈবা ষ্টেট বিজেপিগী হেদ ওফিস তম্না খোঙচৎ অমা চৎখি। মীয়াম অদুনা “দাউন দাউন বিজেপি”, “ৱি সপ্পোর্ট ওজা বিমোল” হায়বা খোল্লাউ কয়ামরূম লাউখি। মীয়াম অদূনা জে এন য়ূ অথোরিটিগী থৌওংশিং অদূবু কন্না য়ানিংদবসু ফোঙদোকখি।
মনিপুর পুলিস পার্সনেলশিং মফম অদুদা চঙশীল্লক্তুনা পামদবা থৌদোকশিং থোক্তনবা অকনবা মওংদা চেকশীন-থৌরাং লৌখৎখি। সম্মোন থারকখিবগী মতূঙ ইন্না দিল্লি পুলিসকি মনাক্তা চৎননবা মহাক শেম-শারে, অদূম ওইনমক কিহন-খংহনবগী থৌওং চত্থরকপদা মায় লৈদুনা কৈদৌনুংদা চেল্লোই হায়না মীয়ামদা দা.বিমোলনা ফোঙদোকখি। মমাঙদসু সোনিয়া গান্ধী অমদি রাহুল গান্ধীদা ইনভেষ্টিগেসন এজেন্সি শিংনা পূঙ ৯ হেন্না ৱাহং-পাউহং চত্থখিবগী থৌদোক পল্লদুনা বিমোলনা হায়, দিল্লি পুলিসকি থৌওং অসী হায়র অথোরিটিনা পীরকপা ইন্সট্রক্সন মখাদা কিহন-খংহল্লগা মখোয়গী অপাম্বদা থম্ননবা থৌরাং অমনি। আর্মীগী কষ্টদিদা মনিপুরিশিংনা মীওৎ-মীনৈ মায়োক্নবা অসী অনৌবা অমা নত্তে হায়খি।
ঙরাংগী খোঙজঙ অদূ রাজনিটি দল অমত্তগা মরী লৈনদে। বিমোলবু মীয়াম্না মপূঙফানা শৌগত্তুনা চত্থখিবনি হায়না মশীঙ য়াম্লবা মীয়াম অদুগী মহুৎ শিল্লদুনা দা. তিনা কুমারি কৌবি দেন্টিষ্ট অমনা ফোঙদোরকখি।
