সেন্টর অমদি মনিপুরগী বি জে পিনা লোক সভাগী এম পি দা.অঙোমচা বিমোল অকোয়জমগী মথক্তা, সেক্সচুয়েল হরাসমেন্ট গা মরী লৈননা য়ূম্ফম য়াওদবা মরাল শীদুনা মীয়ামদা শন্দোক্লিবা অসী য়ানিংদে হায়দুনা খোল্লাউ কয়াগা লোয়ননা থৌবাল দিষ্ট্রিক্ট কি লৈশাংথেমদা ঈমা-ঈবেলশিংনা বি জে পিগী মায়োক্তা প্রোটেষ্ট তৌখ্রে। লৈশাংথেম অমদি অকোয়বদা লৈরিবা মীয়াম অদূনা লৈশাংথেম কৈথেলদা অকনবা খোল্লাউ কয়াগা লোয়ননা, এম পি বিমোলদা মরাল শীরকপা য়ানীংদে হায়না পেন্দবা ফোঙদোকখি। “বিমোলগীদমক মীয়াম লৈরি, ঐখোয় লৈরি” হায়বা খোল্লাউশিং লাউখি।
প্রোটেষ্ট অদুদা শরুক য়াখিবা লৈশাংথেম অপূনবা লূপ কি সেক্রেটরি ওইনাম ইবোপিশক অমসুং মৈরা পায়বী ঈমাশিংনা ফোঙদোরকপা মতূঙ ইন্না, এম পি বিমোলনা ঙসী ফাওবদা মনিপুর মীয়ামগীদমক পার্লিয়ামেন্ত হাওসতা অকনবা ৱাফম কয়া, খোঙফম থীন্দুনা ফোঙদোক্তুনা লাক্লিবা অসী বিজেপিনা অকীবা ফাওরকপদগী মরাল অমা পীশীল্লগা মহাক্কি মিংচৎ থীহন্ননবা লৌখৎলকপা অরোনবা থৌরাং অমনি। মেইনলেন্দ ইন্দিয়াগী মীয়ামদা মনিপুরগী লৈরিবা ফীভমশিং বিমোলনা ময়েক শেংনা খঙহন্দুনা লাক্লি। বি জে পি লৈঙাক্না মনিপুরগী মীয়াম্বু উশীত্তবা-থওইদবা মীৎয়েং অমগা লোয়ননা করিসু নাচুংদনা লৈরিবা মতৌ অদূ ময়েক শেংনা ফোঙদোক্তুনা, য়ারোই হায়বা ঊৎলিবা মীয়ামগী লুচিংবনি বিমোল। বি জে পি অমদি মসীগা ৱাখল্লোন মান্নবশিংনা এম পি বিমোলবু কিবদগী শেমজীন-শাজিনবা মরাল অমা পীশীন্ননবা হোৎনরক্লিবা অসী মনিপুরগী মীয়াম্না ময়েক শেংনা খঙই। মদূ মীয়াম্না কৈদৌনুংদা য়াগদবা লৈতে হায়খি।
দিল্লিগী চিফ মিনিষ্টর ওইখিবা অর্বিন্দ কেজ্রিৱালবু বিজেপিনা মরাল পীশীল্লগা জেলদা নমশীনখি। মখোয়গী মায়োক্তা লৈবা মী খূদীংমক মাঙহনখিগদবনি হায়বগী অরোনবা এজেন্দা অমগী মখাদা সেন্টরগী বিজেপি না অরানবা ময়াম চত্থরক্লি। রাজ্য সভাগী এম পি সর্দা অমসুং মহাক্কি মতূঙ ইনবা খরনা বিমোলবু লান্না শন্দোক্নবা হোৎনরিবসি কৈদৌনুংদা কৈদৌনুংদা মায় পাক্লোই। মীয়াম্না বিমোলগীদমক লেপ্লি হায়খি। মনিপুরদা হীঙশাগী ঈরাং মতমদা মীয়ামগী লুচিংবা অসীনা আই দি পিশিং গী পিরাং তৈথোকপিখি। মতমদুদা বিজেপিগী সর্দা কদায়দা লোৎলুবগে, মশক ফাওবা উবা ফংখিদে হায়বা ৱাফম ইমাশিং অদুনা ফোঙদোকখি।