ৱার্ল্ড হেল্থ ওর্গনাইজেসন (দব্লিয়ু ঐচ ও) না লাক্কদৌরিবা কুমশিং ২০৩০ ফাওবগী মনুংদা মালেমদগী ট্যুবরক্যুলোসিস (টি বি) লায়না মপূঙ ফানা মূত্থৎনবা পান্দমদা থবক পায়খৎলক্লিবা অসীগা ইরোয়ননা ইন্দিয়াগী ওইনসু টিবি লায়না মূত্থৎনবা পান্দমদা ঙরাং নেস্নেলগী থাক্তা টিবি মুক্ত ভারত অভিয়ান, জোইন্ট স্কৱাদ ফোর হেল্থ লোঞ্চ তৌখ্রে।
য়ুনিয়ন হেল্থ মিনিষ্টর জে পি নাদ্দানা ন্যু দিল্লিদা থৌরমদু হৌদোকখিবনি।
মনিপুরগী ওইনসু নেস্নেল টিবি ইলিমিনেসন প্রোগ্ৰাম, নেস্নেল হেল্থ মিসন অমসুং দিরেক্তরেট ওফ হেল্থ সার্বিসেস, মনিপুরনা শীন্দুনা ইম্ফালগী চীংমৈরোংদা লৈরিবা ক্লাসিক গ্ৰান্দেদা টিবি মুক্ত ভারত অভিয়ান থৌরম পাঙথোকখ্রে। নেস্নেলগী থাক্তা হৌদোকখিবা থৌরম অদূ মনিপুরদসু রাজ্য সভাগী এম পি অধিকারিময়ূম সর্দা, হেল্থ এন্দ ফেমিলি ৱেলফেয়র গী কম্মিস্নার সুমন সিংহ, হেল্থ সার্বিসেস দিপার্টমেন্টগী দিরেক্তর দা. এন হেমন্তকুমার অমসুং এন ঐচ এমগী দিরেক্তর দা. এম দিনেস শরূক য়াখি।
কুমশিং ২০১৪ দগী চত্থরক্লিবা টিবি মুক্ত ভারত অভিয়ানদা মায় পাক্লবা, টিবি লায়না লৈত্রে হায়না লাউথোকখ্রবা ইম্ফাল ৱেষ্ট দিষ্ট্রিক্টকি উচীৱা অমসুং থৌবাল দিষ্ট্রিক্টকি লাংমৈথেৎ ভিল্লেজদা থবক তৌখিবা হেল্থ ৱার্করশিং দা মনা পীদুনা ঈকায় খুম্নবা ঊৎখি।
থৌরমদুদা অথোয়বা মীথুংলেন ওইনা শরূক য়াখিবা এম পি সর্দানা হায়, কুমশিং ২০১৪ দগী হৌদুনা চত্থরক্লিবা টিবি মুক্ত ভারত অভিয়ান অসি লৈবাক অসিদা লায়নাসি কুমশিং ২০৩০ ফাওবগী মনূঙদা মপূঙ ফানা মূত্থৎনবনি। লায়না অসী চেকশীন্না ঙাকথোক্নবা হোৎনরবদি থেঙলবদা থা তরুক্কি মনূঙদা মূত্থৎপা ঙম্মি হায়বসি সধারন মীয়ামদা এৱ্যের্নেস পীদুনা পাক-সন্না খঙহনবা মথৌ তারি হায়খি।