কুমশিং ২০২৭ কি অঙনবা শরূক্তা পাঙথোক্নবা থৌরাং তৌরিবা ১৩ শুবা মনিপুর লেজিসলেটিব এসেমব্লিগী মীখল অসীগা মরী লৈননা, হৌখিবা সেপ্তেম্বর ২৪ দা শাফোঙখিবা পোলিটিকেল পার্টি অমা ওইনা লৈরিবা পিপল্স রিফোর্মেসন পার্টী (পি আর পি) গী অহানবা মীয়ামগী মীফম (সপ্পোর্টর মিট) ঙরাং ইম্ফালগী এয়রপোর্ট লম্বীদা লৈবা হোন্দা এন্দ টোয়োটা সোরুম কমপ্লেক্সতা পাঙথোকখ্রে।
পার্টি অসীগী প্রসিদেন্ট এনি মংশাতাবম অমসুং ভাইস প্রসিদেন্ট টি বিজয়কুমারনা থৌরম মপূশিং ওইদুনা মীফম অদূ পাঙথোকখিবনি। মনিপুরগী তোঙান তোঙানবা কেন্দ্রশিংদগী লাকপা নহা-অহলশিংনা সপ্পোর্টর মিট অদুদা শরুক য়াখি।
টি বিজয়কুমারনা ফোঙদোকখিবা মতূঙ ইন্না, মহৌশাদগী হৌনা মহাক্তি পোলিটিক্স অসিদা থৱায় লূপশীনবা মী অমা ওইনা হৌরকখিবনি। হৌখিবা কুমশিং ২০২৩ দগী হৌরকখিবা হীঙশাগী ঈরাং অসিদা মনিপুরগী এম এল এ অমদি মিনিষ্টর কয়ানা ঈরাং অসি লোইশিলহন্নবা থবক পায়খৎপগী মহূত্তা দিল্লিগী য়াকা য়েংলগা লৈবদগী মীয়াম্না খম থেংনা অৱাবা মায়োক্নরক্লিবা অসী কোকহন্দবা য়ারক্তবদগী নৌনা শেম্লকখিবা পোলিটিকেল পার্টি অসীদা য়াওরকখিবনি।
অনৌবা পার্টি অসীদা মীয়াম্না মহাও তংখ্রবা, মশক খঙলবা মীওই অমত্তা য়াওহল্লোই, মীরেপ ওইননবা টিকেৎসু পীরোই, মতীঙ লৈবা, মনিপুর কনগে হায়না পূকচেল শেংনা চোংথোরকপা নহারোলশিংদা টিকেট পীগনি হায়খি।
