ইম্ফাল ইষ্ট দিষ্ট্রিক্টকি মনুঙচন্না ক্যামগৈগী সেগা পল্লি মনাক্তা লৈবা লৌফম অমদা, খাওবা লোইরদুনা য়ৈননবগীদমক পৈখৎলগা থম্লিবা ফৌবৈ অমা হৌখিবা নবেম্বর ১৮ গী নুমিদাং পূং ৮ লোম তারকপদা শকখঙদবশিংনা মৈনা তুম্না থাদোক্লম্লে ।
ফৌবৈ অদূ মাইবম সনাতোম্বা কৌবা লৌমী অমগীনি হায়রি। ফৌবৈ মৈ থাবদা চেন্নবশিং অদূ লৈঙাক্কি অথোরিটিনা অথূবা মতমদা ফাগত্তুনা খূদম-চাংদম ওইগদবা মওংদা খ্বাইদগী অকনবা চৈরাক পীয়ু হায়না মায়কৈ অদোমগী ক্লব, ওর্গনাইজেসন কয়ানা লৈঙাক্কি মীৎয়েং চিংশিন্নরক্লি।
ফৌবৈ অদুগী অয়াম্বা শরুক মৈনা চাকখিবা মরম্না অচৌবা অমাঙ-অতা থোকহনখ্রে। মৈ চাকখৎলকপা মতমদুদা মনাক অদুদা লৈরম্বা মীওইশিংনা কন্ননবা হোৎনখিবগা লোয়ননা মনিপুর ফয়ার সার্বিসকি অথোরিটিদসু পাউ পীখি। ফয়ার সার্বিসকি টিম্না মফমদুদা থুংলখিবা মতমদদি ফৌবৈ অদূগী অয়াম্বা শরুক মৈনা চাকথেকখ্রবা মরম্না কান্নবা ফংখিদে।
খুন্নাইগী মায়োক্তা লৈদুনা মীওইবগী থৱায় ওইরিবা ফৌ মৈ থারম্বা মীওইশিং অদুগী মথক্তা লৈঙাক্না অকনবা থবক পায়খৎলু হায়না মায়কৈ কয়াদগী ফোঙদোক্নরক্লি।
