হৌজিক ন্যু দিল্লিদা লৈরিবা চিফ মিনিষ্টর য়ূম্নাম খেমচান্দ না ঙরাং নুংদাংৱাইরম য়ুনিয়ন মিনিষ্টর ওফ য়ূথ এফ্যের্স এন্দ স্পোর্তস, দা.মান্সুক মন্দাভিয়াগী ওফিসিয়েল রেসিদেন্স তা চত্তুনা মিনিষ্টর অসিগা উনখ্রে।
হন্দক জাপানগী আইচি-নাগোয়াদা পাঙথোকখিবা এসিয়ান গেম্স তা ইন্দিয়াগী কন্টিঞ্জেন্ট তা শরূক য়াখিবা মনিপুরগী শান্নরোয়শিংনা খ্বাইদগী ফজরবা পার্ফোমেন্স পীদুনা গোল্ড মেদল য়াওনা তোঙান তোঙানবা মেদলশিং লৌরকখিবদা য়ুনিয়ন মিনিষ্টরনা অপেনবা, হরাওবা ফোঙদোরকখ্রে।
ইন্দিয়াগী ইহান হানবা ওইনা মনিপুরদা লিংখৎলিবা নেস্নেল স্পোর্তস য়ুনিভর্সিতীদা মহাক ইকুই কুইদনা লাক্তুনা য়েংশিনগনি লোয়ননা হৌজিক স্পোর্ট্স মিনিষ্ট্রিনা মনিপুরদা পায়খৎলিবা প্রোজেক্তশিং অসী য়েংশিনবা ওইনা মনিপুরদা লাক্কনি হায়বা ৱাফমশিং মিনিষ্টর অসীনা চিফ মিনিষ্টর দা খঙহনখি হায়রি। উনখিবা অদুদা চিফ মিনিষ্টরনা মনিপুরদা স্পোর্টস চাওখৎনবা লৈঙাক্না লৌখৎলিবা থবক-থৌরম কয়াগী মতাঙদা পাউদমখি।
স্পোর্টস দিসিপ্লিন খরগী ওইনা লৈবাক অসিদা ফেদরেসন অনী লৈবা য়াওরিবসি অথূবা মীৎয়েং চঙদুনা ফেদরেসন অমখক লৈহন্নবা থবক লৌখৎপিয়ু হায়না তকশীনখি। অনী থোকপগী মওং অসীনা মরম ওইরগা শান্নরোয়শিংদা খুদোংচাদবা কয়ামরুম মায়োক্নরে হায়বা ৱাফম চিফ মিনিষ্টরনা ফোঙদোক্লমখি।
