নেস্নেল হায়ৱে ২০২, ইম্ফাল -উখ্রূল লম্বী, সঙ্কাই কুকি খুলগী গেট মনাক্তা, মে ২৯ অমসুং ৩০ গী লোন্নবা অহীঙদা শকখঙদবশিংনা এক্সকাভেটর শীজীন্নদুনা ফুট ২ খরা হেন্না লুনা তৌখায়রগা থনমম্লে, অদূগা ফুট অনীরোম পাক্না তৌখায়রম্বনি হায়রি। থৌওং অদূনা মরম ওইদুনা অথূ-অকায়গী ওইনা খুল অদুগী মীওইশিংগী চত্থোক চৎশিন তৌবদা খুদোংচাদবা কয়ামরুম থোকহনখ্রেসু হায়রি।মতম খরগী ওইনা ইম্ফাল -উখ্রূল লম্বী ফাওনবা য়াহনখিদ্রে।কুকি মিলিটেন্টশিংনা থৌওং অদূ চত্থরম্বা ওইরমগনি হায়না খুঞ্জাশিংনা থাজনরি।মফম অদূ ঙাক-শেনবগী থবক-থৌরমশিং বোর্দর সেক্যুরিতী ফোর্স(বি এস এফ) না পান্নবনি।
কুকি মিলিটেন্টশিংনা ঈরাং ঙাইহাক লৈতনা থোকহন্দুনা, এত্তেক কয়ারক হন্না চত্থদুনা মীওই কয়া শিহনখ্রবা অমসুং কয়া অমনা অশোক-অপন নংহন্দুনা লৈরিবা মফম অদুদা ঙসীফাওবা লৈঙাক্না মিলিটেন্টশিং অসীবু লাকশীন্ননবা অমসুং চৈরাক পীনবা থৌরাং অমত্তা লৌখৎপা ঙমদনা লৈরে হায়না মীয়াম্না পেন্দবা ফোঙদোক্নরক্লি। নাকল অমরোমদা, কাংপোকপি দিষ্ট্রিক্টকী গাম্নোম সপরমৈনা পুলিস ষ্টেসনগী মনূঙচন্না লৈরিবা খারম ৱাইফৈ ভিল্লেজদা মে ৩০ গী অহীঙদা অতৎ-অখম লৈতনা, য়াম্না কন্না নোংমৈ কাপ্লকখ্রে।মসীগীসু মথক্তা খুল অদূগী য়ূম কয়ামরুম অহীঙদা মৈ থাদোক্লম্লে।
মে ২৯গী নুমিদাংদা কাংপোকপি দিষ্ট্রিক্ট পুলিস, সিআরপিএফ অমদি অসাম রাইফল্সকি টিম অমা লাক্লগা মফম অদুগী ভিল্লেজ ভল্লন্টিয়রশিং তান্থোক্লমখি।মদূগী মতূঙ মে ৩০ গী অহীঙদা খুল অদূ মৈ থাদোক্লমখিবনি হায়রি। মিপাইনরবা খুঞ্জাশিং শাফগদবা মফমশিংদা লাঞ্জেন্নদুনা লৈখ্রে।