পাকিস্তানগী মনূঙ হঞ্জিন্না লৈরিবা লমখৈ শরুক্তা অমদি লৈবাক অদুনা ওক্যুপাই তৌদুনা লৈরিবা কাস্মিরগী শরুক্তা ইন্দিয়ান মিলিটরিনা রিটালিয়েটরি এত্তেক চত্থদুনা টেরোরিষ্ট ১০০ হেন্না হাৎখ্রবা মতূঙদা হৌজিক লৈবাক অসিদা ওইরিবা নেস্নেল সেক্যুরিটি সিনারিওগী ফীভম করম্বা থাক্তা লৈরিবগে হায়বদু য়েংশিন্দুনা য়ুনিয়ন দিফেন্স মিনিষ্টর রাজনাথনা চ্যের লৌদুনা ন্যু দিল্লিদা নেস্নেল সেক্যুরিটি রিভ্যু মীটিং পাঙথোকখ্রে।
নেভি, এয়রফোর্স অমসুং আর্মীগী টোপ ওফিসারশিং য়াওনা পাঙথোকখিবা সেক্যুরিটি রিভ্যু মীটিং অদুদা ইন্দিয়াগী নোংচুপ থংবা অমসুং অৱাং নোংচূপ থংবদা লৈরিবা ষ্টেটশিংগী তোঙান- তোঙানবা সহরশিংদা পাকিষ্টান্না দ্রোন, মিসাইল অমদি আর্টিল্লরি মখল কয়ামরুম কাপশীল্লকপা য়াই হায়বগী ইন্টলিজেন্স রিপোর্ট শিংগী মতাঙদসু ঙরাংগী মীফমদুদা কূপ্না খন্ন- নৈনখি হায়রি।
চৈরকশিদা পাকিষ্টানগী ৱার প্লেন অনী ইন্দিয়ান মিলিটরিনা কাপথখ্রে অমসুং লৈবাক অদূগী পাইলোট অমা ইন্দিয়ান আর্মীনা ফাজীনখ্রে হায়না পাকিষ্টান্না য়াজখ্রে। চান্দিগরদা পাকিস্তানগী মায়কৈদগী মিসাইল এত্তেক অমসুং এয়র রেইদনচিংবা চত্থরকপা য়াই হায়বা ইন্টলিজেন্স রিপোর্ট অমা ফংবদগী মীয়াম চেকশীন্না লৈননবা সাইরেন খোংখ্রে। ঙরাং নুংথিল পূঙ অহুম তাবদসু সেন্ট্রেল দিল্লিদা সাইরেন খোংদুনা মীয়াম চেকশীন্না লৈননবা থবক লৌখৎখি। আর্মী চিফ জেনরেল উপেন্দ্র দ্বিবেদি, নেভি চিফ এদমিরেল দিনেস কে ত্রিপাথি অমসুং ইন্দিয়ান এয়রফোর্স চিফ এয়র চিফ মার্সেল এ পি সিংহনচিংবা টোপ ওফিসারশিং রিভ্যু মীটিং অদুদা শরুক য়াখি।