চৎলিবা আগষ্ট থা অসিগী ১৭ তগী হৌগদৌরিবা, সেন্সসকি শরূক অমা ওইরিবা য়ূমকোক থীবগী থৌরম অসীগী ইন্যুমরেটর অমসুং সুপরভাইজর ওইগদবশিংগী ট্রেনিং অমা এস কে ৱিমেন্স কোল্লেজ, নম্বোলদা হৌদোকখিবগা লোয়ননা ট্রেনিং চত্থবা হৌরকপদা জে এফ দিগী ষ্টুদেন্টস ৱিংনা খঙহৌদনা চঙশীল্লক্লগা থৌরম অদূ থুগাইখ্রে।
পুলিসনা খোঙজঙ চঙশীল্লিবা মহৈরোয় খরা ফাজীন্দুনা থম্লুরে।
থা অসীগী ২৫ ফাওবা ফেজ মরি থোক্না চত্থগদবা ট্রেনিং কেম্প অদূগীদমক কোল্লেজ অদূগী কনফরেন্স হোলদা সেন্সসকি ইন্যুমরেটর অমদি সুপরভাইজরশিং ঙরাং অয়ূক পূঙ ৯ তাবা অদূৱায়দগী লাক্তুনা ট্রেনিং চত্থনবা থৌরাং তৌখি। খূদক্তুদা জে এফ দিগী ষ্টুদেন্টস ৱিংগী খোঙজঙলোয় কয়ামমরুম থোমজীন্নরকখিবগা লোয়ননা ট্রেনিং অদূ চত্থবিগনু হায়জখি। ট্রেনিশিং অদূ মপান্দা থোকহল্লবা মতূঙদা কনফরেন্স হোল অদূ থোঙ লোন্সীনখি। “নো এন আর সি, নো সেন্সস” হায়বা ৱারোল ইবা প্লেকার্দশিং ফক্লাং অমদি গেট্টা নপশীন্দুনা অকনবা প্রোটেষ্ট চত্থখি।
খোঙজঙ অদূনা কোল্লেজশিংগী এগজাম চত্থখিবা অদুদদি অপনবা অমত্তা পীখিদে।সেন্সসকি ট্রেনিং অদূ থুগাইদুনা চত্থহন্দ্রে হায়বা পাউ তাবদগী নম্বোল পুলিস ষ্টেসনগী ওফীসার-ইন-চার্জনা লুচিংবা কম্মান্দো পার্সনেলশিং চঙশীল্লক্তুনা খোঙজঙ চঙশীনখিবা মহৈরোয় খরা তান্নদুনা ফাজীনখি।
মখোয়দূগী মথক্তা আইনগী ওইবা থবকশিং লৌখৎলবা মতূঙদা খোঙজঙলোয়শিং অদূ তেক্ত-কায়দনা থাদোরকখ্রে হায়রি।
