এম এস সি দব্লিয়ু না সেন্ট্রেল জেল ইম্ফালগা খূৎশম্নরগা ইনমেট নূপীশিংগী এৱ্যের্নেস পাঙথোকখ্রে

মনিপুর ষ্টেট কম্মিসন ফোর ৱিমেন (এম এস সি দব্লিয়ু) না মনিপুর সেন্ট্রেল জেল, ইম্ফালগা খূৎশম্নরগা নোংমগী ওইবা লিগেল এৱ্যের্নেস প্রোগ্ৰাম অমা ঙরাং সেন্ট্রেল জেল অসীদা পাঙথোকখ্রে। “লিগেল এৱ্যের্নেস ফোর ৱিমেন ইনমেট,” হায়বা থিমদা পাঙথোকখিবা প্রোগ্ৰাম অদুদা ৱিমেন কম্মিসন অসীগী চ্যেরপার্সন থুমলিপ তিনিংফম মোন্সাংনা হায়, করিগুম্বা থৌদোক অমা নত্রগা অমনা মরম ওইদুনা জেলদা ইনমেট ওইনা লৈরিবা নূপীশিং অসীনা থেংনরিবা অৱাবা, খুদোংচাদবশিং অদু হকথেংননা মশক খঙদোক্লগা কোকহন্নবা মথৌ তাবা থবকশিং লৌখৎনবা পান্দমদা এৱ্যের্নেস অদূ পাঙথোকপনি।

জেলগী ষ্টাফ নত্রগা অতৈ মীওইশীংনা কা হেনবা থবক -থৌওংশিং চত্থরকপদা নূপী ইনমেৎশিংনা খাঙদুনা, লোৎশীন্দুনা লৈগদবা নত্তে। চিংনবা, ঈকায়বা অমসুং অকিবা অমত্তা লৈতনা মরী লৈনবা অথোরিটিদা খূদক্তা ৱাকৎনবা হোৎনগদবনি হায়খি। জেল অসীগী এস পি ওইরিবা ভাদ্রিকান সু শরূক য়ারদুনা ৱা ঙাঙখিবা থৌরমদুদা মনিপুর লৈঙাক্কি মখাদা লৈরিবা ইনফোর্মেসন এন্দ পব্লিক রিলেসন্সগী এদ্দিস্নেল দিরেক্তরসু ওইরিবী, কম্মিসন অসীগী মেম্বর সেক্রেটরি দব্লিয়ু ফজতোম্বি দেবিনা হায়,  ইনমেট নূপীশিংনা পূক্নীং শোন্থনা, ঈকায়-ফীরূক খুমদুনা তুমীন্না লৈশিনগদবা নত্তে।

মৈ, ঈশীং অমদি তঙায়ফদনা চঙবা পোৎলমশিং ফংহন্দবগী নত্রগা মরাঙ কায়না পীদবগী নত্রগা মতম চানা য়ৌরক্তবগীবু ওইরবসু, হীরম অমা নত্রগা অমগী মতাংদা পেন্দবা, নুঙাইতবশিং অদূগী মরমদা মরী লৈনবা অথোরিটিদা ৱাকৎনবা হোৎনগদবনি হায়খি। ৱিমেন কম্মিসন অসী নূপী খুন্নাইগী খুদোংচাদবশিং কোকহন্নবগীদমক থবক তৌরিবনি হায়নসু ফজতোম্বীনা মখা তাখি।