মোইরাংপুরেল সি ঐচ সিদা লায়েঙবগী টিকেট মমল লন্নাই হোস্পিটালদগী হেল্লম্লে : পুয়া

ইম্ফাল ইষ্ট দিষ্ট্রিক্টকি মনূঙচন্না মোইরাংপুরেলদা লৈরিবা লৈঙাক্কি কম্যুনিটি হেল্থ সেন্টর (সি ঐচ সি) অসী অঙকপনা পীক থনবা মওংদা লন্নাই মেদিকেল ফেসিলিটি অমদগী ফাওবা হেন্না, অনাবা মীওইশিংনা ও পি দিগী টিকেট ককপা মতমদা মমল কা হেন্না লৌবা থেংনরে হায়না পিপল্স য়ুনাইটেদ য়ূথ এল্লায়ন্স (পুয়া) গী মায়কৈদগী ফোঙদোরক্লি। লূপ অসীনা লমদম অসীগী চীঙ – তমগী মফম কয়াদা কোয়না চত্তুনা, লৈঙাক্না চল্লাইবা হেল্থ সেন্টরশিংদা হৌজিক লৈরিবা ফেসিলিটিশিং য়েংশিন্দুনা লাক্লিবা অদূগী শরূক অমা ওইনা ঙরাং মোইরাংপুরেল সি ঐচ সিদা অনীরকশুবা ওইনা য়েংশিল্লুবদা নোর্মেল ওইনা অনাবা মীওই অমগী ওপিদি দা লায়েঙনবা টিকেট ককপা মতমদা মমল লূপা ১০০ লৌরম্বা থেংনখি হায়না পুয়াগী জেনরেল সেক্রেটরি লোংজম অবোথেনা অঙকপা ফোঙদোরকখি।

লোয়ননা, লৈঙাক্না চল্লাইরিবা,  লৈতা-লায়রবা মীয়ামগী অনা-লায়েঙশঙ অসীদা লন্নাই হেল্থ সেন্টর অমগী মতৌগুম টিকেটকি মমল ৱাংনা লৌরিবসি মরী লৈনবা অথোরিটিনা য়েংশিনফম থোকই হায়খি। মহাক্না মখা তানা হায়, ইমর্জেন্সিগী অনাবা ওইরবদি টিকেৎকি মমল অসী খরা অমুক হেঙ্গত্তুনা লূপা ১৫০ লৌরি। অল্ট্রাসাউন্দ লৌবগী ওইরগনা নোর্মেলদা লূপা ৫০০ লৌরম্বা থেংনৈ অদুগা মীরোনবীগী ওইরবদি মমল লূপা ৩০০ লৌই হায়না পাউদম্লকখি।

মনিপুরদা লৈরিবা লৈঙাক্কী অনা-লায়েশঙশিংদা মশাগী দ্যুটি তারিবা দাক্তর, নর্সনচিংবগী মহূৎ শিল্লগা অতোপ্পা দাক্তর, নর্সশিংদা পুহনবগী চৎনবী অসী মোইরাংপুরেল সি ঐচ সিদসু অদুম্মক চত্থদুনা লৈরম্বসু থেংনৈ হায়না অবোথে মৈতৈনা মখা তানা ফোঙদোকখি।