অন্দ্রো কেন্দ্র শেমগৎনবা এম এল এ শ্যামকুমারদা ক্রোর ১০ পীরগনি: চিফ মিনিষ্টর

অন্দ্রো কেন্দ্রদা চাওখৎ-থৌরাংগা মরী লৈনবা থবক-থৌরমশিং মপূঙফানা পায়খৎপদা হেন্না খুদোং চাননবা লোকেল এম এল এ থৌনাউজম শ্যামকুমারদা লূপা ক্রোর ১০ গী শেনফম খূৎশীন্নরগনি হায়না চিফ মিনিষ্টর য়ূম্নাম খেমচান্দনা ফোঙদোকখ্রে।
ঙরাং অন্দ্রো কেন্দ্রদা নৌনা শাবা ঈমা কৈথেল অমা, কেন্দ্র অসীগী মনূঙ চন্না লৈবা থৌবাল তুরেলগী খূন্দোংবম মপা দা শাবা থোং অমা অমসুং ৱাংখেম সিফাই লৈকায় মপাদা থৌবাল তুরেলগী মথক্তা শাবা থোং অনী শঙ্গাবগী থৌরমদা চিফ মিনিষ্টরনা ৱাফম অসী ফোঙদোকখিবনি।
কেন্দ্র অসীদা য়াম্না থুনা ম্যুনিসিপাল কাউন্সিলগী ওফিস অমসু শাবা হৌরগনি হায়না মহাক্না মীয়ামদা থাজবা পীখি। থৌরমদুদা অন্দ্রো কেন্দ্র গী এম এল এ থৌনাওজম শ্যামকুমার, ষ্টেট লৈঙাক্কি প্লান্নিং দিপার্টমেন্টকি দিরেক্টর, রুরেল ইঞ্জিনিয়ারিং দিপার্টমেন্টগী চিফ ইঞ্জিনিয়র অমদি মকোকথোংবা ওফিসিয়েল কয়াসু শরুক য়াখি।
অন্দ্রো অসী মনিপুরগী ওইনা চাউথোকচনিঙায় ওইবা লমদম্নি হায়না ফোঙদোক্লদুনা চিফ মিনিষ্টরনা মখা তানা হায়, অন্দ্রোদা মহৌশাদগী মূৎপা নাইদনা মতম চূপ্পদা চাক্লিবা মৈ অসীগী মতাঙদা মায়কৈ কয়াদগী থিজিনবগী থবক চত্থনরি। তোঙান তোঙানবা মফমশিংদগী মীয়াম্নসু য়েংবা লাক্নরি হায়খি।
চহী অহুম হেন্না চত্থরক্লিবা হীঙশাগী ঈরাঙ অসীগী মতাঙদা মহাক্না হায়, হিংমিন্নরিবা কাঙলূপশিংগী মরক্তা মূক্নদুনা, য়েংথীনদুনা মতম শাংনা লৈবনা ঐখোয় মশেল মরক্তা নুংশিনবগী মরীদা শোকচীল্লক্কনি, হৌরক্লিবা নহারোলশিংগী মতূঙ তারকপা পুন্সিদা হেন্না খুদোংথীনিঙায় ওইরক্কনি অদুগা লমদম অসীগী মীয়ামগী শেন্মিৎলোন্দা হেন্না চৈথেং পীরক্কনি হায়খি।