মনিপুরগী ঈরাং অসী সেন্টর লৈঙাক্না ফোরেন কন্ট্রি অমদা থোকপা থৌদোক অমগুম লৌরি: এম পি বিমোল

হৌখিবা কুমশিং ২০২৩ গী মে অহুমদগী ঙসী ফাওবা মনিপুরগী য়েলহৌমীশিংনা মায়োক্নরিবা মীহাৎ -মীপূনগী, য়ূম মৈ থাবগী, লন-থুম তুম্না মাঙখিবগী থৌদোকশিং অসী সেন্তর লৈঙাক অসীগী লূচীঙ পুরেল ওইনা লৈরিবা প্রাইম মিনিষ্টর নরেন্দ্র মোদিগী মীৎয়েংদা, ইন্দিয়াগী মনূঙ চন্দবা, ইন্দিয়া নত্তবা ফোরেন কন্ট্রি অমদা থোকপা থৌদোক অমগুম লৌরি হায়বসিদা হায়মনবা থোক্তে হায়না ইন্নর মনিপুর পার্লিয়ামেন্টরি কন্সটিট্যুয়েন্সিগী লোক সভা এম পি দা.অঙোমচা বিমোল অকোয়জম্না ফোঙদোকখ্রে।
চৎলিবা এপ্রিল থা অসীগী ২০ দা ন্যু দিল্লিদা লৈবা ওল ইন্দিয়া কংগ্ৰেস কম্মিটি (এ আই সি সি) গী ওফিসতা পাঙথোকখিবা পাউমীশিংগা উনবগী থৌরমদা বিমোলনা ৱাফম অসী ফোঙদোকখিবনি।মহাক্না হায়, প্রাইম মিনিষ্টর নরেন্দ্র মোদীগী মফমদা মনিপুর চৎনীংবগী ৱাখল য়াওদে।মনিপুরদা চৎনবগী মতমসু অমত্তা প্রাইম মিনিষ্টর দা লৈতে। মনিপুরগী থোক্লিবা হীঙশাগী ঈরাং অসী কনানা থোকহনবনো হায়বা চপচানা খঙলিবা প্রাইম মিনিষ্টরনা মসীবু লোইশিন্ননবা হোৎনবসু লৈতে।প্রাইম মিনিষ্টর মশামক্না ৱাহৈ অমত্তং হায়বা মতমদা ঈরাং অসী লেপকনি হায়বদুসু মোদি মশামক্না খঙজরিবনি। ঈরাং অসী মখা চত্থহল্লগা য়েলহৌমীশিং মূৎখ্রসনু হায়বগী ফিরেপ অমা মাল্লক্লে হায়খি।
ঈরাং অসীগী মরমদা ৱাহৈ অমফাওবা মহাক্না ঙসী ফাওবদা ফোঙদোকখিবা লৈত্রি। মনিপুরদা পূং অমখক্কি খোঙচত্তা নোংমা লাক্লমখি। প্রোজেক্ট খরা শঙ্গারম্লগা, হৌজিক থোক্লিবা হীঙশাগী ঈরাঙ অসীগী মতাঙদা ৱাফম অমত্তা পল্লমদনা হনখি।মরোল থোক্ট্রিবা, থা মঙাখক্তা ঙায়রিবা অঙাঙ ফাওবা আর পি জি কাপশীন্দূনা তমথীনা হাৎলক্লবা মতমসি ফাওবা প্রাইম মিনিষ্টর মরোল থোক্তবা অমগুম তূমীন্না লৈরিবসি মালেমগী মফম অমত্তদা থেংনখিদ্রিবা অঙকপা অমনি হায়না দা. বিমোলনা পাউমীশিংদা ফোঙদোকখি।