মনিপুরদা হৌখিবা কুমশিং ২০২৩ গী মে অহুমদগী কুকি-জো কাঙলূপকি মিলিটেন্ট শিংনা চত্থরক্লিবা হীঙশা য়াওবা ঈরাং অসীদা মৈতৈ কাঙলূপকি নূপী অমসুং অঙাঙশিং য়াওনা মীওই ৩০০ লোম হাৎখিবা, মীওই কয়া অমনা ঙসিফাওবা থিবা ফংদনা লৈরিবা অদুগা মৈতৈ অমসুং কুকি কাঙলূপকি ইমূঙ লীশীঙ কয়ামরুম ময়ূম মকৈ লৈহনখিদবদগী লাঞ্জেন্নহন্দুনা তোঙান তোঙানবা রিলিফ কেম্প শিংদা হৌজিক ফাওবা অৱাবা খাঙদুনা, চঙজফম লৌদুনা লৈরিবা অসীগী ফিভমশিং য়েংশিনবা লাক্কদৌরিবা সুপ্রিম কোর্ট কি জজ ৬ অসিবু মনিপুরদা লৈরিবা কাঙলূপ পূম্নমক্কি মীয়াম্না হরাও- তরাম্না ওকফম থোকই, ঐখোয় খূদীঙমক্না তরাম্না ওকমিন্নসি হায়না মনিপুর প্রদেস কংগ্রেস কম্মিটি (এম পি সি সি) গী প্রসিদেন্ট ওইনা থৌ পুরিবা এম এল এ কৈশাম মেঘচন্দ্রনা ফোঙদোকখ্রে।
ইম্ফালগী বির টিকেন্দ্রজিৎ রোদতা লৈরিবা কংগ্রেস ভাবন্দা পাঙথোকপা পাউমীশিংগা উনখিবা থৌরম অমদা মহাক্না ৱাফম অসী ফোঙদোকখিবনি। সুপ্রিম কোর্ট কি জজ ৬ না চুরাচান্দপুরগী তোঙান তোঙানবা মফমদা হাংদোক্লিবা রিলিফ কেম্প শিংদা য়েংশিনগনি হায়রিবা অসিদা মনিপুরি মৈতৈ কাঙলূপ্তগী সুপ্রিম কোর্ট কি জজ এন কোতিশ্বর গী ওইনদি অথীংবা থমগনি, চঙলকপা য়ারোই হায়রক্লিবসি মীওইবা অমগী লীচৎ নত্তে হায়না মহাক্না ফোঙদোকখি।
লাক্কদৌরিবা এপ্রিল ৮ দগী হৌদুনা ইন্দিয়াগী তোঙান তোঙানবা মফমশিংদা কংগ্রেস কি মপাঙ্গল হেন্না কনখৎহন্ননবা তোঙান তোঙানবা থাক্তা এ আই সি সিগী মীৎয়েং মখাদা মীফমশিং পাঙথোক্লগনি হায়নসু মেঘচন্দ্রনা ফোঙদোকখি।
You may also like
-
স্পোট পেন্টীং কম্পিটিসন, ক্বিজগী থৌরম পাঙথোকখ্রে
-
নেস্নেল হায়ৱে-৩৭ দা লম্বী চৎপা য়ারমদবদু শেংদোকখ্রে, গারিশিং চৎপা হৌখ্রে
-
থাঙ-তা মশান্না অসী ওলেম্পিক গেম্সতা য়াওহন্দুনা শান্নরোয়শিংদা কান্নবা পীবা য়াই: প্রেমকুমার
-
লৈঙাক অমা নীংথিনা চল্লাইনবা হোৎনবদা মেদিয়াগী অচৌবা থৌদাং লৈ: চরঞ্জিৎ
-
সেন্টরগী লুচিংবশিংদা নোঞ্জরগা লৈঙাকপগী মহূৎ শিজখিবনা শরূক চাম্মা হেন্না ফৈ: ইবোবি