চৎলিবা জনুৱারী থা অসীগী ২১ গী নুমিদাং পূঙ ৬.৪০ রোম তাবদা চুরাচান্দপুর দিষ্ট্রিক্টকি তুইবোং এরিয়াদা লৈবা নূপী মপামদগী য়ুনাইটেদ কুকি নেস্নেল আর্মী (য়ু কে এন এ) না ফাদুনা পুখ্রবা মতূঙদা তমথীনা ওৎ-নৈরবা মতূঙদা মীহাৎ থীনা হাৎতোকপিখ্রবা ককচীঙ খূনৌ উচান মখোঙদগী ময়াংলম্বম রিষিকান্ত গী ঈমূঙ-মনূঙগী মীওইদা মনিপুর লৈঙাক্কি মায়কৈদগী এক্স-গ্ৰেসিয়াগী শেনফম লূপা লাখ ১০ পীরগনি হায়না লাউথোকখ্রে।
নাকল অমরোমদা, রিষিকান্তগী থৱায় য়াওদ্রবা হকচাং অদূ ৱাইখোঙ পুলিসকি টিম অমনা পুরক্তুনা হৌজিক জেনিমস কি মোর্গ তা লৈরি। ঈমূঙ-মনূঙগী মীওইশিংনা লৌশীল্লু য়াদ্রি। জে এ সিনা লৌরকপা ৱারেপ্না অরোয়বা ওইগনি হায়রি।
লৈখিদ্রবা ময়াংলম্বম রিষিকান্তগী থৱায় য়াওদ্রবা হকচাং অদূ চুরাচান্দপুর পুলিসনা ফৌগাকচাউ ঈখায় পুলিস ষ্টেসনগী ওফিসর-ইন-চার্জ অমদি কাংবাইদা লৈরিবা গারৱাল রাইফলসকি মমাঙদা ঈমূঙ-মনূংগী মীওইশিংনা ভেরিফাই তৌহল্লবা মতূঙদা ৱাইখোং পুলিস ষ্টেসন দা খূৎশিন্নরকখিবনি।
